WILLEMSTAD – Ya pa algun dia tin un foto ta sirkulo di un kolebra grandi ku lo tin riba tereno di Isla. EXTRA mesora a tuma kontakto ku Stanley Ignacio ku a indiká ku esaki parse un kolebra di Kòrsou pero ku esaki ta hopi grandi. Mesora el a deskartá ku ta trata di un Boa komokiera ku na Aruba kolebranan aki ta kousa hopi molèster i destrukshon na naturalesa. Lokual ta straña Stanley Ignacio ta e grandura di e kolebra aki komo ku kolebra di Kòrsou ta krese normalmente te 1 meter pa e embra i 90 centimeter pa e machu. Tambe e echo ku e kolebra ta kologá asina den palu ta straño. “Nan por subi pa kue un raton pero keda kologá asina no ta nan karakterístika.” Finalmente Stanley Ignacio a enfatisá ku e kolebra di Kòrsou ta esun di mas pasivo na mundu. “Nan no ta venenoso ni ta strangula, no ta pika ni morde hende.” E mes ta buskando tur forma pa haña un oportunidat pa drenta wak e kolebra aki di aserka.