Un felis djamars pa tur nos lektornan...

Nos tin nos embahadornan, pabien na kada un di nan i tambe na tur e otro partisipantenan ku a demostrá ku nos tin talento aki na Kòrsou...

Di nos banda pabien na Beehives i tambe na IBFF pa tremendo produkshon...

Hom, hopi hende tabata warda riba dje...

Rumba pa Tumba a start ayera nochi, Glenn ta pone tur hende keda wak televishon te lat, pa nan disfrutá dje variedat di videoclip di tumbanan ...

Tremendo ambiente anochi riba TeleCuraçao...

E sintonia di Glenn ta bárbaro...

E hendenan ta keda lantá na Hulanda pa nan sigui Glenn...

Djabièrnè último e oportunidat pa bandanan inskribí pa risibí refuerso di e ‘pool di brass’ a sera...

Nos a risibí informashon ku ta 16 banda a inskribí pa esaki...

Ta pendiente pa bin ku dos ‘pool’ di ‘tres’, trompèt ku 2 trombon...

E ta indikashon ku bandanan ta hasi bon uso dje oportunidat pa ‘upgrade’ nan presentashon ta alsa nivel dje festival tambe...

Ayera tardi nos a bai Festival Center un ratu i mester bisa ku Beehives tin e infrastruktura pa Festival di Tumba drechá kaba, ta kestion di pone stul i detayenan chikí pa e lugá ta kla...

Massive tin ku drenta ainda pa hasi nan ‘set-up’ pa djasabra awor nos hóbennan por kompetí den Festival di Tumba Hubenil...

Djadumingu ta inskripshon i AMAK i su partnernan lo tin e ‘challenge’ pa manera Tumba Hubenil kaba anochi nan kuminsá drecha e lugá pa inskripshon di tumba...

Ta basta trabou tin ku wòrdu hasi den anochi i mainta trempan pa por keda kla...

E bon ta ku inskripshon mes ta kuminsá 4or di atardi i lo terminá 7or di anochi...

Mi ta kere ku a hasi e orario mas kòrtiku pa por atraé esnan ku ta bin inskribí den un bloke loke ta yuda tene e evento ‘bibu’ ...

E oportunidat ku a brinda aña pasá pa por a drenta Festival Center ku trailer i yega te na e entrada dje área di inskripshon a kontribuí ku tin banda ku a hasi bon uso di esaki...

Loke ta great ta ku AMAK ta sigui inová den Festival Center, ma mira ayera ku e entrada ta wòrdu drechá, a koba di kaya i ta reforsá e fundeshi dje kaya pa djei asfalta ...

E tim di produkshon pa Tumba+, e nòmber nobo pa loke ántes ta konosí komo ‘pay per view’ tambe ta trahando duru pa sigui trese inovashon i variashon den e konsepto di transmishon...

Den e siman akí lo tin mas detaye i mas splikashon pa fasilitá e proseso pa aboná i tin tumba den kas pa esnan ku no por asistí na e festival...

E sistema nobo ta brinda yen opshon i sin konta e kampaña ku a traha riba dje pa ofresé un kantidat di premio pa esnan ku kumpra nan pakete...

Pa awe nos ta keda te aki, ban sigui traha na adelanto di nos Pais...

Te mañan ku Dios ke!