Un felis djamars pa tur nos lektornan...

Ayera nochi ma bolbe pasa den e lista di partisipantenan pa Festival di Tumba 2026 i tin algun kombinashon ku lo bira hopi interesante e aña aki...

Tin algun kompositor ka sinta hasi nan hùiswèrk i buska un bon kantante pa nan komposishon...

Tin kombinashon di kompositor i kantante ku ta promé biaha nan tei traha huntu, pero ku bo ta mira ku tabata un deseo dje kantante pa por traha ku un kompositor eksitoso den Tumba...

Tin algun hende ku ainda no a harma nan tumba ku banda, den awe òf mayan ta start pa djei keda ripití...

Ayera ma komprondé di Gio Atalita ku e supladónan for di Venezuela ta kuminsá yega for di awe pa djabièrnè pa dje forma ei bandanan ku ta kla pa kuminsá pasa tumba ku brass por start...

E skema ku ta keda hinka den otro pa e refuersonan di brass ta pone ku bandanan mester ta kla pa ensayá ora ku e bus kore yega ensayo...

Djadumingu presidente di hurado a bolbe rekordá tur hende riba e reglanan di partisipá ku muzik pre-programa...

Mi tin ku bai chek ku AMAK pa nos haña sa ta kuantu banda ta usando e parti di programashon pa nan partisipashon...

Te asina leu ku mi sa ta CATIPA ta e úniko konosí ku ta kai den e kategoria aki...

Un punto importante ta e echo ku e programashon ta ser hasi riba un tempo i e músikonan i òf kantante mester keda den e tèmpo ei, no por laga emoshon dominan, adrenalina subi i despues ta un ‘korementu di kabai tin’, paso a toka ‘bibu’ mas lihé ku e programashon...

Nos mester ta konsiente ku lo sigui tin desaroyo pa loke ta trata muzik, pero nos no mester pèrdè identidat di nos tumba di karnaval dor di bira kreativo di mas...

E dushi di nos Festival di Tumba ta ku ora adrenalina subi, e músiko ta duna e piesa un sous èkstra...

Tin biaha tambe te públiko ta pidi pone ku e tèmpo ta subi...

Bon ta ku tin un BPM, beats per minute, ku ta riba un tèmpo haltu ku ta pone ku bo por push un tiki mas...

Pero bo mester tene kuenta ku e ta keda un ko’i baila, jump riba dje i no di sali na kareda...

Ocho Rei di Tumba den kompetensia, esaki ta indikashon ku lo tin un kompetensia fuerte...

Kompositornan ganadó tambe tin basta un par den kompetensia...

Loke tambe ta pone ku bo ta ferwagt ku e kompetensia lo ta duru paso nan tin e malchi di komponé un tumba ganadó...

Esnan ku djadumingu tabata den Festival Center por a tuma nota ku a basha un flur den e área kaminda normal tin e ‘lounge area’, aworakí no tin nodi di kana den tera ni lodo dado kaso áwaseru kai...

Dilanti di stage tambe a asfaltá un pida basta grandi atrobe, esaki pa mantené e superfisie bon ...

Ayera AMAK i Ike Jesurun tabata di bishita serka Gobernadó...

Nos a risibí algun detaye dje bishita, pero konforme protokòl ora bo bai bishita serka Gobernadó, no sa divulgá kontenido dje kombersashon...

Great ku Gobernadó a invitá Ike i AMAK pa hasi un bishita di kortesia...

Jeon a duna su aporte na nos festival di tumba ta algu great...

E aña aki no tin kantante ni banda for di Aruba, e skèdjel di Karnaval ta kasi idéntiko i esaki ta stroba ku nan por bin Kòrsou bin kompetí den nos Festival di Tumba...

Bon nos tei move, felis dia...