Un felis dia na tur nos lektornan...

Tin un situashon di atenshon pa loke ta trata algun grupo di Karnaval...

Despues ku 2 grupo di Gran Marcha a informá ku nan no ta partisipá mas den Karnaval, tin informashon ku tin gruponan ku nan kantidat di miembronan a baha...

Un dje motibunan prinsipal di esaki ta e mundial di futbòl, e ‘once in a lifetime opportunity’ ta pone ku ta skohe pa bai Mundial en bes di partisipá den Karnaval...

E situashon akí a pone ku algun grupo a pèrdè un kantidat basta supstansial di miembro...

Bo por a mira ku te asta tin grupo, ku manera e dosnan a anunsiá ku nan no ta bai mas a probechá mesora pa tira liña riba e miembronan dje gruponan ei...

Tin hende ta ‘vast’ den un grupo, otronan ta ‘shop around’ i dependé ambiente ta djòin...

Ban spera ku e efekto aki no ta dje grandi...

Ayera m’a kòmbersá ku un konosido músiko i nos a papia un ratu riba Karnaval otro aña...

E temporada lo ta mas kòrtiku, loke ta pone ku lo mester organisá algun evento den luna di desèmber pa dje forma ei e kalènder lo por bai kuadra un tiki...

Pa Festival di Tumba dje aña aki tin algun banda ku pa nan e siman di tumba ta riba man...

Bandanan popular a toka henter desèmber drenta yanüari i awor sin hala rosea mester kuminsá prepará pa Festival di Tumba...

E músiko ta hiba di pensamentu ku lo mester por skùif e temporada un tiki...

Nos problema prinsipal ta ku ora bo skùif, lo bo tin problema ku e temporada di Seú...

Pero e situashon ta un ku mester wòrdu evaluá, segun e músiko, si nos ke sigui engrandesé nos Karnaval...

Den otro informe, awe nochi lo tin un rueda di prensa di AMAK for di Wilhelminaplein, Plasa Alameda den Punda...

Awe nochi lo tin tambe e tradishonal ‘rankamentu di number’ pa órden di aparishon di nos gruponan di Karnaval...

Esaki ta tuma lugá na Promenade, asina AGKK a informá...

Awe nos a kompartí ku nos lektornan e letranan di e Tumba Hubenil ganadó ...

Krea un tumba rondó dje ‘remote’ kontròl i pone ambiente kuné, bon pensá Furgell i Brento “Payo” ku ta e kompositornan...

Tremendo ambiente ayera nochi atrobe ku ‘Rumba pa Tumba’ i Glenn Thomas...

Entretené bo oyentenan ta un arte ku poko por...

‘By the way’, bishitá e página di Facebook di korant EXTRA pa bo tende un tiki mas dje kantantenan ku lo partisipá na Festival di Tumba...

Un kantidat di entrevista a ser hasí i bo por skucha for di boka dje kompositor òf e kantantenan kontenido di nan tumba i tambe sera konosí un tiki mas ku e kantantenan nobo...

Heo, tabata un plaser pa kompañábo atrobe ku otro edishon di e kolumna ‘DEN E BEMBE’...

Si bo tin komentario, bo por manda bo reakshon na lacuriel@hotmail.com

Felis dia !!!