Un bon siman na nos lektornan, nos a habri siman di Festival di Tumba 2026...

Un siman ku lo ta karga ku muzik, yen di ambiente i pa mardugá di djasabra nos lo tin un Rei òf Reina di Tumba 2026...

Bandanan ta den ensayo ful swing, ayera yen banda a publiká unda nan tin nan ensayo habri i esaki a pèrkurá pa atraé un grupo grandi di fanátiko na diferente dje puntonan di ensayo...

Nos tabata den Festival Center ayera tardi bai kue anochi i mester bisa ku Festival Center lo lusi hopi bon awe nochi...

E adaptashonnan ku a keda hasi na e infrastruktura ta bai laga e sitio lusi aun mas...

E stage ora ku sende e lusnan i duna esaki efektonan di lus, ta keda hopi bunita i ta laga e festival lusi aun mas...

Mi no por splika tur kos, mester laga kada persona biba e eksperensia...

Papiando di eksperensia, kon ta ku bo TUMBA+, ba instalá esaki kaba, ma komprondé ku ayera i awe for di 8or di mainta pa 2or di mèrdia lo bo por risibí asistensia dje tim di sosten si bo no a logra pa hasi e instalashon...

App +59995293310 pa e tim di sosten yuda bu...

Awe ta dia ku nos ta publiká e formulario pa partisipá na e kampaña di Rei ken ta Sali Rei òf Reina di Tumba 2026...

Mi konseho, kòrta e formulario ora bo kaba di skucha tur tumba djárason anochi, yena e formulario i bin tira esaki den e buzon spesial na edifisio di EXTRA...

Mas formulario bo yena mas chèns bo tin pa gana si bo tin e kombinashon korekto di e Rei òf Reina i su promé finalista...

Formularionan por keda entregá pa mas tarda djabièrnè, 30 di yanüari 2026 pa 7or di anochi...

E ganadó lo risibí komo premio un pakete pa 10 persona por disfrutá di Karnaval ku un kantidat di ko’i bebe i kome...

Partisipá den e tremendo kampaña ku Korant EXTRA na kaminda pa selebrashon di 50 aña...

Ayera den buskamentu di informashon riba ensayonan di tumba, tin algun tumba sigur di 2 banda ku ta presentá djárason ku no ta kla ainda...

Ma komprondé ku ámbos tumba di kantantenan popular ta awor nan ta wòrdu harma pa djei pone brass aserka...

Den e sound check di ayera nochi, un komentario adishonal, e brass di Highway Band ta zona hopi bon...

Mi ta gosando ku kantantenan i bandanan a bira mas kreativo den promové e banda, kantante durante dje siman di Festival di Tumba...

Hopi video di ambiente durante di ensayo i tambe promoshon riba retnan sosial di kantantenan...

Tur e kosnan aki ta kontribuí na promové e festival i krese e interes pa bai Tumba...

Pa awe, sòru pa bo ta trempan den Festival Center, e parti ofisial ta kuminsá promé ku 8or pa despues tin e pre-show ku presentashon di Jeon...

Jeon lo presenta su show kompletu ku durashon di 1 ora, yega trempan pa bo disfrutá di e artista di momentu...

Despues di su presentashon lo tin e presentashon di bandanan ku ta partisipando na Festival di Tumba...

Sinku banda ku 12 tumba...

Robert ‘Patriota Mayo’ ta habri festival ku su presentashon i e festival ta sera ku presentashon di Tempo Music ku kuater tumba...

Awe den e kompositornan Ike Jesurun, Doña Elia Isenia i Robertico ‘Benoni’ Balentien ta esnan ku ta resaltá...

Nan tres ta kompositornan ku a gana e Festival, kòrda ku Festival di Tumba ta un festival di kompositor...

Tin diferente otro kompositor ku a yega di klasifiká ku tin un komposishon awe’nochi den kompetensia...

Jeon tambe ta den kompetensia awe ku 1 komposishon, un tumba pa Mosta Man...

Hopi a kere ku ta un basilon, pero ayera den entrevista ku Rames di Korant EXTRA Mosta a konfirmá su partisipashon...

Ban wak kon ‘Kandela den Pipa’ tei zona awe nochi...

Great a mira kon Ofisina di Turismo den kolaborashon ku Ministerio di Ekonomia a duna nan kontribushon na Marcha Hubenil...

Tur e gruponan a risibí un kontribushon i tambe nos embahadornan hubenil a risibí un aporte ...

Bon esaki ta tur kos pa awe, awe nochi nos ta topa den Festival Center...

Kualke kos pasa na e stage kaminda mi ta i saludá, nos por interkambiá di opinion riba e presentashon di bo artista faborito...

Bon siman i te mañan ku Dios ke!...