WILLEMSTAD.- Kombersashonnan pa habri frontera ku Venezuela ta kanando den bon direkshon. Mientrastantu e areglo di visa pa venezolanonan a drenta na vigor. Segun minister-presidente Eugene Rhuggenaath e reglanan di COVID-19 ta keda vigente dado kaso habri frontera ku Venezuela próksimamente.
Rhuggenaath a splika ku desde 15 di yanüari tur pasahero di Venezuela ku mester bini Kòrsou òf un di e seis islanan Karibense di Reino Hulandes, mester apliká pa visa. Esaki ta bai via un sita ku bo por traha riba wèpsait.
Rhuiggenaath: ‘Tambe mi por bisa ku famianan ku ta biba na Kòrsou lo por haña informashon via di Dienst Buitenlandse Betrekkingen (DBB).’
Petishon pa e visa akí ta kana solamente segun sita. Personanan ku tin mester di un sita pa atendé nan visa, por manda nan petishon via di un e-mail pa Direktorado di Relashonnan Eksterior di Kòrsou na consulaire.dbb@gobiernu.cw. E Direktorado akí na su turno ta fasilitá e proseso i ta sòru pa e petishon yega na e Ministerio di Asuntunan Eksterior na Hulanda. Kostonan pa e visa ta 80 euro, ekskluyendo eventual gastunan atministrativo.
Na momentu di biahe, e pasahero mester tene kuenta tambe ku medidanan di COVID-19 ku ta vigente na Kòrsou na e momentu ei. Tur e medidanan akí ta disponibel riba wèpsait di Gobièrnu di Kòrsou (gobiernu.cw/corona-travel-tocuracao/).
Riba e eksigensia di visa akí sinembargo ta eksistí algun eksepshon. Personanan di nashonalidat venezolano ku ta disponé di un di e siguiente dokumentonan, no tin mester di un visa pa por biaha pa Kòrsou:
-Un pèrmit di estadia pa un di e paisnan den Reino;
-Un visa di Schengen (un zona ku ta konsistí di 26 pais Oropeo);
-Un pèrmit di estadia pa un di e paisnan den Area di Schengen òf
-Un pèrmit di estadia permanente pa Estádos Unídos, Canada òf Reino -
Personanan ku mester pasa di tránsito na Kòrsou tampoko mester hasi petishon pa un visa Karibense.
Pa mas informashon, por tuma kontakto ku e Direktorado di Relashonnan Eksterior na consulaire.dbb@gobiernu.cw