Despues di komentarionan durante transmishon

CINCINNATI.- Ayera e komentarista di e ekipo di Cincinnati Reds, Chris Welsh, a bai buska e yu di Kòrsou Ozzie Albies den kamerin di bishita na Great American Ballpark pa pidié diskulpa. E analista a duna su opinion tokante e situashon di e akuerdo ku Albies a firma algun siman pasá durante transmishon di partido di djárason último. Loke a sorprendé tur hende ku Welsh a indiká ku Albies ta bin for di Kòrsou i ku e ta pober i ku si un hende ofresé e hungadó 35 mion, lo e no sa e diferensia entre 35 mion dòler i 85 mion dòler. El a sigui komentá ku e no por kere kon agente di e yu di Kòrsou por permití e hungadó firma un akuerdo ku lo por kosta Albies miónes di dòler. Tambe el a kuestioná kon e negoshashon a bai. Ku si Atlanta Braves a papia ku famianan, mediante Albies su agente òf ku tabatin kualke preshon. E remarkenan aki a trese hopi disgustu i reklamo di diferente ángulo riba Twitter di tantu otro reporteronan i tambe ekspertonan den mundu di beisbòl. Esaki sigur a pone ku Welsh a hañ’é ta bai personalmente ayera i pidi su diskulpa na Ozzie Albies.