Den kaso Themis(NLS)

WILLEMSTAD. - E komersiante akusado C. Lake (49) ku a keda kondená na 8 aña den kaso Themis, a apelá su veredikto. Lake ta insistí ku e ta kompletamente inosente den e kaso aki i e kosnan no ta manera Ministerio Públiko ta akus’é di dje. Ministerio Públiko ta akusá Lake pa labamentu di plaka di kasi 23 mion florin.

Banda di esaki, Lake a ser konsiderá komo man drechi di  S. “Tyson” Quant ku Ministerio Públiko a konsiderá komo lider di e geng di NLS. (No Limit Soldier).

Tambe Lake ta keda akusá di ta afiliá na NLS ku na opinion di hustisia ta un organisashon kriminal basta grandi fo’i aña 2015 te ku 2020. Outoridatnan a konkluí, ku Lake ta atendé asuntunan finansiero di Quant i ta su hòmber di konfiansa.

E tabata esun ku ta sòru  paga eks pareha nan di Quant i tambe a kumpra dos Audi ku plaka kèsh pa Quant su mama i su yu muhé.

Banda di esaki Ministerio Públiko ta akus’é di tabata esun ku tabata kumpra pasashi pa mulanan.

Durante e investigashon, Ministerio Públiko a konfiská un outo marka Chevrolet Tahoe ku Lake a kumpra 137 mil florin kèsh na e agensia.

Segun e investigashon, Lake a paga 107 mil florin pa un kantidat di persona na ticket.

Mas akusashon kontra di Lake ta ku e lo a laba mas di mas ku 22 mion florin. El a kumpra un Land Cruiser, Tahoe, Rolex ku a kosta mas di 15 mil florin, djamanta,  kas den Zuurzak i vários kosnan kostoso.

Durante tratamentu di e kaso, Lake a bisa ku e tin suèltu ku ganamentu di loto konstantemente i tin prueba di e bònnan.

E ta hasi su trabounan legal, entre otro kore trùk pa un kompania grandi i otro trabounan.

Banda di esaki e ta komersiante i tabatin su trùk ku ta bende kuminda tur dia.  Wes den korte di promé instansia a duna di konosé den e veredikto, ku e úniko kos ku por ser probá den e kaso di Lake ta, ku el a kumpra e Landcruiser ku plaka di fiansa na MCB.

Sobra ophetonan ku Lake lo a kumpra, wes a konsiderá nan komo labamentu di plaka.

Den e veredikto wes a pone vários kombersashon ku a keda di tap, entre Quant i Lake kaminda nan tabata papia konstantemente di bendementu di blòki, ticket pa mula, montante nan grandi di plaka, entregamentu di droga i fotonan di droga ku tabata keda mandá via telefòn.

Wes a bisa den su desishon, ku tur esakinan ta sufisiente prueba ku Lake tabata envolví di organisashon kriminal i tabata kómplise di e aktonan di violensia inkluyendo intento di asesinato, trafikashon di droga i labamentu di plaka.   Tur esakinan a pone wes a bai di akuerdo ku e demanda di 8 aña pa Lake i a bai di akuerdo tambe pa konfiská su kas na Zuurzak, Tahoe i vários montante di plaka kèsh. E kaso lo keda tratá den korte di apelashon kompletamente di nobo.