WILLEMSTAD.- Dia 13 di desèmber 2019 hues a kondená e komersiante di resiklahe T.B. (44), na 36 luna di kual 12 kondishonal  pa aktonan di inmoralidat ku un menor fo’i tempu ku e tabatin 14 aña te ku 17 aña. Riba e mesun dia, den sala di korte hues ta ordená pa detené e hòmber i hiba prisòn. Esaki a sosodé tambe te ku ayera ora el a sali ku banchi.

Segun informashonnan ku EXTRA ta disponé di dje, detenidonan den prisòn ta basta rabiá ku e desishon/maneho di banchi. I mas ainda e hòmber Brouwer ta haña un kastigu di 36 luna di kual 12 kondishonal, konsekuentemente e lo tin di sinta 24 luna pero kitando VI, e lo mester sinta 18 luna. E no tin ni un aña esta 12 luna será ku ayera el a bini na remarke pa haña banchi i bai kas.

Sinembargo tin e detenido Francillon ku ta será den e kaso di kandela na Ontvanger i ku hues a disidí 3 siman pasá ku ta skòrs su detenshon si e kumpli ku entrega di su pasaporte, paga 50 mil florin i haña banchi. El a kumpli ku e dos proménan i te awe e no a haña banchi.

Su abogado siman pasá a manda karta pa hues riba e situashon aki i ta pendiente un kontesta kiko ta bai sosodé.

Pa e prezunan ta inkomprendibel kon un hòmber ku a violá un hobensita, ku por ta kasi su yu pa 3 aña largu, ta bin na remarke pa bai kas ku banchi. Ta ku kua midí ta midi!