No tabatin quorum

WILLEMSTAD.- Komishon fiho di parlamento di BPD (Maneho di Gobernashon, Planifikashon i Servisio Públiko) a sinta djaweps 19 sèptèmber den un enkuentro informativo ku representantenan di e 5 sindikatonan ABVO, NAPB, SITEK, SAP i STrAF. E reunion tabata a base di e karta ku sindikatonan a manda pa gobièrnu den kua e sindikatonan ta pidi un reunion ku ministernan Charles Cooper, Shalten Hato i Javier Silvania riba e disputa pa eliminashon di e lei pa kòrta ku 12,5 porshento den kondishon laboral di ámtenarnan.

Tabata parlamentario pa partido PAR, Steven Croes ku a manda un karta djaweps pa presidente di e komishon, Sheldry Osepa (PNP) ku e petishon pa sinta urgente ku e sindikatonan. Esaki despues ku durante reunion públiko di djaweps mainta presidente di parlamento, Corine Djaoen-Genaro a bisa ku no ta posibel pa, a base di e karta ku e 5 sindikatonan a manda pa gobièrnu, yama un reunion urgente di komishon fiho di BPD di parlamento. E karta aki a drenta alabes na parlamento i a trata esaki bou di e punto di agènda ‘dokumentonan ku a drenta’.

Djaoen-Genaro a splika ku no ta posibel pa ni via di e punto agènda aki ni via un proposishon di órden pidi e komishon di BPD pa yama un reunion urgente ku e sindikatonan. Uniko ku por hasi ta pa huntu ku e karta ku ta bai pa e komishon parlamento hasi e petishon pa e komishon fiho mas lihé posibel traha un sita ku e sindikatonan. E splikashon tabata debí ku parlamentario pa partido PAR, Ana Maria Pauletta a pidi na komienso di reunion públiko di parlamento di 19 sèptèmber pa e komishon fiho a reuní djaweps mes ku e sindikatonan

Osepa ta bisa ku na promé instante ta duna rèspèt i skucha preokupashon di e sindikatonan. Despues ta keda na kada partido pa a base di informashon ku nan a risibí den e reunion disidí ku ta manda un karta pa gobièrnu ku pregunta òf pa pidi un reunion di parlamento riba e tópiko. Osepa, a base di informashon ku el a risibí, ta kere ku ta e forma kon kosnan a kana ku ta a pone ku e situashon a yega asina leu.

Na su opinion tantu sindikatonan komo gobièrnu mester fria kabes i sinta hunta na mesa pa haña otro. For di e reunion ku e sindikatonan e parlamentario ta haña e impreshon ku tin disponibilidat pa yega na na un kompromiso i Osepa ta spera ku gobièrnu na mesa tambe ta mas habri pa un tipo di kompromiso kompará ku e tono i aktitut ku a demostrá durante e konferensia di prensa di djárason 18 di sèptèmber.

Presente na e reunion tabata parlamentarionan Quincy Girigorie i Pauletta pa PAR, Giselle Mc William i Steven Martina pa MAN, Osepa pa PNP i Rennox Calmes pa (TPK). Frakshonnan ku no tabata presente den e reunion tabata MFK i KEM i tampoko miembro independiente Zita Jesus-Leito. Esaki ta hustamente e parlamentarionan ku ta sostené parlamentarionan ku ta sostené e

Djabièrnè 20 sèptèmber e sindikatonan a reuní for di 10 or di mainta ku minister Shalten Hato den seno di e plataforma di konsulta GOA. Esaki despues ku Hato no por a reuní  for di djaweps 19 di sèptèmber manera e sindikatonan a pidi.

Foto:

...Reunion informashon entre komishon BPD i sindikatonan...