WILLEMSTAD.- E grupo ku ta representá penshonadonan di St. Elisabeth Hospital (Sehos) bou di presidensia di sr. Felix Pinedo, huntu ku Johnsel Diaoen presidente di sindikato CBV a reuní ku miembronan di gerensia di Sehos. Penshonadonan i nan representantenan su kana a yena i a disidí ku nan ta pone preshon na tur manera kontal haña solushon.

Dokumentunan ku informashon konkreto ta indiká ku Sehos durante di hopi aña a kita sierto montante for di trahadónan i awor e trahadónan ta eksigí pa haña e plaka aki bek. Den kombersashon ku e lider sindikal sr. Diaoen el a bisa EXTRA ku nan tabata den reunion pa atendé transishon di Sehos pa hospital nobo HNO pero a posponé esei pa asina duna atenshon na e problema ku a surgi. Durante di reunion di awe mainta a disidí ku partidonan ta lanta un komishon chikí ku mester bai dediká tur atenshon na e problemátika di penshonadonan pa asina haña solushon. Tin un suma di mas o ménos 14 mion ku Sehos lo ta debe e penshonadonan, pero e grupo ta dispuesto na basha awa den biña, pero nan ke mira ku Sehos ta kuminsá move pa kumpli ku e debe. Mas detaye den edishon di EXTRA.