WILLEMSTAD.- e presidentenan di e dos komishonnan fiho di Hustisia i Enseñansa, Siensia, Kultura i Deporte, no ta haña ku ta oportuno pa reuní riba skol Marnix Cas Cora.

E dos presidentenan di e komishonnan ariba menshoná respektivamente sr. Eduard Braam i  Gilbert Doran den un karta ku nan a manda pa presidente di parlamentu, sra. Charetty America-Francisca ta bisa ku nan a tuma nota ku parlamentario sra. Giselle Mc William a pidi un reunion enkuanto e susesonan ku a tuma lugá na e skol sekundario enkuestion.

Pero mirando ku e suseso ta bou di investigashon hudisial, nan ta haña ku lo no ta oportuno pa tene e reunion aki sin ku e resultado di e investigashon aki ta konosí.

Dia 9 di sèptèmber, sra. Mc William a pidi un reunion ku e dos komishonnan ariba menshoná, pa papia di e kaso lamentabel ku a sosodé na e skol sekundario.

Durante di kòntròl polisial na e skol a tacha privasidat di e hóbennan na e skol. Esaki a krea konmoshon tantu bou di alumnonan, mayornan pero komunidat kompleto.

Sra. Mc William tabata deseá e reunion di komishon fiho pa por a deliberá riba e suseso pero tambe e ròl di parlamento tin komo representante di pueblo i pa evitá e tipo di susesonan asina aki den futuro. E parlamentario ta kere ku ta importante tambe pa haña sa di gobièrnu kiko ta e pasonan ku lo tuma.

Na e reunion aki Mc William tabata deseá presensia di minister di hustisia, minister di enseñansa, representante di kuerpo polisial i representante di VPCO.

Pero e dos presidentenan dje komishon ta haña ku no ta oportuno pa reuní riba e tópiko aki awor aki.

Hustamente djaluna a bira konosí ku a desarmá e agentenan ku a hasi kontrol na e skol enkuestion. Investigashon ta sigui kana.