WILLEMSTAD – Den un komunikado emití awe CGTC ta hasi un yamada pa inisiá ku algun proyekto riba término korto mirando e situashon di pais. CGTC ta eksigí pa entre otro e proyekto di Cannabis, ku den komienso ta krea aproksimadamente 400 kupo di trabou, por haña e debido atenshon posibel, di tur e instansianan konserní . Aki ta referí na: VVRP, ROP, GMN, Ministerio di Finansa, ku tin ku trata ku pèrmitnan, proseduranan i kisas e “screening” di e desaroyadónan di e proyekto, pa e proyekto akí por mira lus di dia.

CGTC ta kere ku riba un término kòrtiku, por yega asina leu, ku e invershonistanan di e proyekto akí, ku ketu bai ta wardando riba gobièrnu pa e.o aprobashon di tereno, i tur e pèrmitnan nesesario, p’asina nan por kuminsá habri oportunidat i kaminda pa kreashon dje kuponan di trabou pa nos yunan di Kòrsou.

Den mesun rosea, CGTC ta mira ku e proyekto “Capital Market Hub”, ta otro oportunidat ku lo sòru tambe pa un gran kantidat di kuponan di trabou. E  diferente proyektonan den e plan  Reforsá, si nan logra di haña e rapides pa nan keda ehekutá, por kuminsá saka pais for di e krísis finansiero i  sosial, kaminda un grupo basta grandi di esnan ku ta buskando trabou, por drenta e proseso laboral.

E interes ku dirigentenan di CGTC tin pa e plan Reforsá, ta únikamente pa tur esnan ku ta buskando trabou, por haña e kaminda pa trabou i keda na trabou, p’asina mañan nan támbe por disfrutá  di e benefisionan ku e proyektonan lo bai kosechá.

Den edishon mayan di EXTRA lo bin mas amplio riba e komunikado importante aki ku CGTC a emití awe mainta.