WILLEMSTAD. - Obispu Luis A. Secco den su afan pa aportá positivamente den e situashon ku tabata reina pa ku Kòrsou su demokrasia a duna di konosé ku e tin speransa grandi den e forsanan positivo di komunidat di Kòrsou. Obispu Secco a bisa ku e tambe ku un kurason ku ta kompartí e sentimentunan di angustia, di disgustu ku ta reina pa motibu di e último desaroyonan ku ta tumando lugá den komunidat, relashoná ku funshonamentu di nos demokrasia.

Den e kaso aki komo siudadano i komo Iglesia Katóliko no por keda ketu den e situashon aki. Pasobra esei kier men, ku ta traishoná e komunidat su identidat.

Papa Francisco ta bisa klaramente ku “Iglesia tin ku tuma parti aktivo den polítika, pasobra polítika ta un di e formanan mas altu di karidat, pasobra ta buska e “bienestar komun”. Laikonan kristian tin ku traha den polítika. Esei no ta fásil, pasobra e loke ku por konstatá ku pa desgrasia polítika ta hopi kontaminá.

E pregunta ta, Dikon e ta kontaminá? Pasobra kristiannan no ta envolví den dje ku e Spiritu di Evangelio. Ta fásil kritiká, pero komo kristian kiko por hasi pa kambia e realidat negativo aki?

P’esei ta un deber di komunidat pa traha i aportá pa e bienestar komun” (Papa Francisco, Enkuentro ku laikonan katóliko, 2017).

Pa e motibu aki Obispu Secco kier pone énfasis den e karta aki riba e balor fundamental di demokrasia pa dignidat di hende i defendé e bienestar komun. Tur esaki ta ankrá riba prinsipionan di Nashonnan Uní.

Demokrasia ta un di e balornan i prinsipionan mas universal i importante di Nashonnan Uní.

E ta mará na e deseo di un pueblo di por ekspresá su mes na un manera liber riba asuntunan di su pais. Tambe e ta mará na e libertat i posibilidat di ehersé derechonan humano manera ta deskribí den e Deklarashon di Nashonnan Uní.

Ta bon pa remarká ku elekshonnan ta parti di e kurason di e deklarashon. Ta elekshon ta duna posibilidat i garantia pa nos determinashon propio.

Banda di Nashonnan Uní, Iglesia katóliko a mustra for di prinsipio riba e balor di un bon gobernashon pa un pais. Papiando di demokrasia, Papa San Huan Pablo II a skirbi den su Ensíklika “Centesimus Annus” lo siguiente:

“Iglesia ta apresiá e sistema demokrátiko, pasobra den dje ta keda sigurá e partisipashon di e siudadanonan den opshonnan polítiko. Ta garantisá na e elektornan e posibilidat di eligí i di kontrolá e gobernantenan ku nan a skohe i pa kita nan na momentu oportuno di un manera pasífiko.

Pa e motibu ei Iglesia no por favoresé formashon di gruponan chikí ku ta usurpá poder di Estado pa interesnan individual òf pa motibunan ideológiko...” (CA 46).