WILLEMSTAD.- “Komo supmarino semper nos ta hasi nos trabou den sekreto. Hopi bia nos ta hasi trabou, ku nos no por divulgá ku niun hende. P’esei bo por bisa ku nos trabou ta algu espesial.” Asina teniente marino di primera klase Erwin Ruijsink a splika ayera. Ruijsink su funshon ta komandante di supmarino di Marina Real Zr. Ms Zeeleeuw. Segun Ruijsink tur tripulante di e supmarino ta hende ku a skohe deliberadamente pa e supmarino. “E ta algu super speshal, bo no por kompará esaki ku un boto di marina.”

E supmarino ayera tabata habrí pa prensa. E supmarino estilo Walrus a tuma parti na ehersisionan den Karibe. Marina Real ta disponé di 4 di e tipo di supmarinonan aki i nan ta esnan mas moderno, nan no ta nuklear. Loke ta hasi nan diferente di otro ta nan grandura ku ta hasi posibel pa nan por kore den awa no hundu i buska informashonnan entre otro na kosta. E supmarino aki tin un grandura di 68 meter largu i 8,5 meter hanchu i un profundidat di 7.5 meter. E por bai te 300 meter hundu i tin 55 tripulante na bordo. Loke tambe ta masha remarkabel di e supmarino aki ta ku e por ta bou di awa di forma invisibel, sin saka zonido i p’esei ta masha difísil pa barkunan, avionnan i otro supmarinonan haña sa di dje. Tambe e por keda hopi tempu largu bou di awa pa por ehekutá enkargonan.

E supmarino lo sali for di Kòrsou mañan. Ruijsink no por divulgá kiko ta e siguiente destinashon di e supmarino.