E ke negoshá pa manehá i operá Refineria Isla

WILLEMSTAD.- Awe mainta a surgi un karta fechá 22 di yüli 2019 ku aparentemente ta dirigí na gobernador di Kòrsou su ekselensia sra. Lucille George-Wout. Ta trata di un karta di e kompania GeoPetroleum NV (Oil & Gas Exploration and Trading Company) den kua e presidente direktor, un tal Hubertus H. Grebe ta mustra su sentimentu di desapunto profundo pa e forma ku gobièrnu di Kòrsou, lesa premier Rhuggenaath i Refineria di Kòrsou (RdK) lo a trata ku e persona aki i su kompania. Mas lat durante di dia EXTRA a haña dokumentashon ku ta indiká ku e kompania aki a keda disolvé basta aña pasá.

Na e momentu ku e karta aki a presentá esei a sòru pa basta konsternashon i konfushon. Mesora esnan mas yegá na e refineria a kuminsá puntra si akaso e gobièrnu aktual i RdK lo tin deseo pa laga refineria sera su porta debí ku un kandidato a mustra interes i tòg no a dun’é ni sikiera e balor di skuch’é i papia kuné.

Den e karta na gobernador e CEO Grebe ta indiká ku na 1979 el a yega Kòrsou pa prome bia, komo invershonista i riba rekomendashon di KPMG. El a gusta Kòrsou mes ora mirando e refineria for di riba brùg. Na yüli di aña pasá (red. 2018) e minister di Desaroyo Ekonómiko di e tempu ei Steven Martina a aserk’é i a inform’é di e posibilidatnan pa prosesá krudo na refineria Isla, despues ku PDVSA no a kumpli ku sierto partinan den su kontrakt di lease.  Komo tal GeoPetroleum a presentá ku dos oferta prome ku e deadline ku tabata 26 di ougùstùs 2018. Sinembargo nunka mas  a tende algu di gobièrnu ni RdK, si akaso nan oferta tabata falta algu òf loke sea. E CEO ta sigui bisa ku el a skibi tres(3) karta dirigí na premier Rhuggenaath i a entrega nan personalmente na Fòrti pero riba eseinan tampoko e no a haña kontesta.

Grebe ta splika nos gobernador den su karta ku GeoPetroleum a kaba di selebrá 40 aniversario resientemente i personalmente e tin 48 aña den mundu petrolero. Su kompania ta traha ku kompanianan grandi manera Saudi Aramco i tambe QatarGas pa loke ta trata LNG. Grebe ta sumamente desepshoná i ta pidi intervenshon di gobernador i asta ku gobernador por invit’é pa papia.

EXTRA a hasi un poko investigashon i basta fásil a haña sa ku Geopetroleum Limited ta un kompania priva ku a keda establesé 03 di mart 2000 i ku a keda disolvé 18 desèmber 2001.

Mas aleu EXTRA a buska e direktor interino di RdK Chonky de Lannoy pa un komentario riba e asuntu partikular aki. De Lannoy den un reakshon kòrtiku a indiká ku RdK su PMO a hasi nan investigashon i a ripara ku e kompania Geopetroleum no ta aktivo mas. Ademas for di un prinsipio e kompania a mustra ku nan no ke aseptá reglanan di e proseso Arawak, kual ta indiká ku mester kana segun un prosedura serio. E direktor ke papia ku polítikonan so i no via PMO. Na di tres lugá Grebe ta bisa ku e ta representá kompanianan grandi, pero RdK mes ta den kontakto ku e kompanianan grandi direktamente pues lo ta algu no korekto pa bai traha via di un intermediario ku lo ke gana su komishon riba tur kos.

Por sierto tin mas kompania ku tambe a presentá nan mes na RdK pero komo intermediario pa kompanianan grandi.

Finalmente e manera so ku Grebe ta aktua di bai plama informashon pafó ta mustra klaramente ku e ta aktuando kontra di e ‘non disclosure agreement’ (NDA) ku a firma ku tur kompania.