WILLEMSTAD. - Despues di a kumpli ku un tarea kompliká pa ku transporte di mulinanan di bientu di Aqualectra, ayera e kompania Ter Linde a bandoná Kòrsou. Por a opservá momentu a pone e diferente ekiponan di e kompania Ter Linde riba e barku Schippersgracht, ku lo sali Kòrsou ku destinashon Aruba i despues lo sigui pa Bèlgika.

Manera menshoná Ter Linde ta e kompania ku a bini Kòrsou 2 luna pasá for di Spaña pa hasi e trabounan di transportashon di e mulinanan di Aqualectra. Esnan yegá ku e proyekto, ta indiká ku por wak patras riba un proyekto eksitoso kaminda Aqualectra huntu ku diferente partner a ehekutá e trabounan pa asina e parke di mulina na Koral Tabak bira un realidat.

Durante un luna largu por a tuma nota di e trabounan di transportashon ku e kompania Ter Linde a ehersé i ku tabatin vários momentu ku a eksperensiá maniobranan espektakular.

Tur kos ta indiká ku pa e luna aki Kòrsou lo kuminsá risibí e promé kilowattnan for di e mulinanan aki.