Vários tereno, toko i Kleine Zuurzak

WILLEMSTAD.- E  otro parti di e kaso Avior, ayera a keda tratá pro forma.

E akusado chines  F.X. a presentá den sala komo kómplise di e kaso grandi aki.

E ta keda akusá pa kómplise di e akusado prinsipal W.S.C, pa labamentu di plaka, keda sin entregá dokumentonan na belasting, servisio bankario subteraneo (ondergronds bankieren), ehersé negoshi di institushon di krédito (internashonal) i di negoshi ku ta manda òf kambia sèn. Tur esaki sin pèrmit di Banko Sentral di Kòrsou i Sint Maarten, den e periodo di 1 di ougùstùs 2011 te ku 15 di ougùstùs 2017.

Segun e akusashon F.X. tin 16 vienes inmóbil riba su nòmber, manera vários tereno, toko i algun establesimentu aki na Kòrsou, ku ta registrá bou di su nòmber, entre otro e konosido “Kleine Zuurzak”, ku Ministerio Públiko a indiká ku mester kaba di investigá algun detaye di e edifisionan en kuestion, pa sa di unda e propiedatnan aki a sali.

E akusado a bisa ku su abuelo a bin Kòrsou i a kumpra hopi tereno ku despues el a pasa pa su tata i su tata a pasa nan riba su nòmber.

Su abogado mr Marije Vaders ayera a  pidi pa skucha 34 testigu di kual un gran parti di nan ta na China. Pero relashoná ku e petishon aki, fiskal a bisa ku entre e personanan ku e abogado ke pa skuchá, tin vários ku ta keda sospechá di a hasi algun transakshon di plaka den e kaso aki i na China tin un lei ku e chinesnan no por hasi un transakshon di mas ku 50 mil dòler pa aña.

Esei por tin konsekuensia serio pe siudadano ku ta biba riba e pais en kuestion.

P’esei fiskal a indiká ku nan komo Ministerio Públiko no por pone e testigunan ei na peliger den nan pais, mirando e kastigu penal ku tin komo konsekuensia.

Dia 15 di ougùstùs 2017 polis a tene entrada hudisial na mas di 10 adrès na Kòrsou ehekutá pa Recherche Samenwerkings Team (RST) i den koperashon ku unidat di Defensa, polis di Kòrsou (KPC), Afpakteam, Koninklijke Marechaussee i polis di Aruba (KPA) na ougùstùs 2017.

E entradanan hudisial tabata den diferente kas, minimarket chines i empresa.

Pareu ku na Kòrsou a tene tambe entrada hudisial den un minimarket i un kas na Rotterdam, Hulanda ku a  keda ehekutá pa outoridatnan hulandes.

E entradanan hudisial tabata den presensia di un hues-komisario i Fiskal di Ministerio Públiko (OM).

Durante e entradanan hudisial a detené e hòmber W.S.C. (1981, China) ku probablemente lo ta e sospechoso prinsipal i sosio di F.X.

E ta ser sospechá di labamentu di plaka i ofresé servisio bankario subteraneo (ondergronds bankieren).

A konfiská  parti di atministrashon, tantu ‘hardcopy’ komo digital pa mas investigashon.

Tambe a konfiská un suma grandi di plaka, ku a totalisá 1 mion florin kèsh.

Vários outo entre nan un Porshe Cayenne, RAV4, Toyota Corolla, Jeep Cherokee, prenda, vários edifisio ku un balor total ku ta surpasá 10 mion florin tambe a keda konfiská.

Despues di algun dia, fiskal a bai di akuerdo pa  W.S.C. bai den libertat, pero bou di kondishonnan estrikto.

E mester a paga un bòrg di 100.000 florin,  entregá su pasaporte i no mag bandoná Kòrsou.

Tambe e mester keda disponibel tur ora pa hustisia.

Ministerio Públiko a ofresé W.S.C. un transakshon pa asina prevení mas persekushon penal.

Dia 9 di mart 2020, Ministerio Públiko i W.S.C. a sera e akuerdo di transakshon. Den kuadro di e transakshon, W.S.C. lo a paga un suma di NAF 250.000,- i a renunsiá vários propiedat (inkluso diferente tereno i edifisio komersial), fondonan riba kuentanan bankario i montantenan di sèn konfiská (durante di e entrada hudisial).

Ministerio Públiko a konsiderá e transakshon unu apropiá, teniendo kuenta tambe ku e fechanan ku a kometé e echo nan (2011-2017), e tempu ku a pasa despues di e konklushon di e investigashon penal (2016-2019) i e sirkunstansianan personal di e sospechoso.

E kaso lo bin bèk na luna di novèmber binidero.