WILLEMSTAD.- Christino “Niño” Oleana a keda demanda un bia mas na 8 aña di prizòn den korte di apelashon.

Oleana ta keda akusá di tabata kómplise di e atrako ku a tuma lugá na altura PSB, kaminda e hòmbernan a bai ku 192 mil  525 florin for di e propietario di Tu i Yo Lottery dia 2 di yüni 2020. El a apelá su sentensia pa motibu ku e ta insistí ku e ta inosente i no sa nada di atrako. Segun e akusado, djis pasó el a kaba si sali fo’i será, ta gaña riba dje.

Relashoná ku e kaso un dia promé ku e atrako, e hòmber di e fam Nita a bira víktima, despues ku 3 hòmber a blòki’e, batié i bai ku su vehíkulo ku a wòrdu uzá pa fuga despues di e atrako na PSB.

Ministerio Públiko ta akusá tantu Oleana ku su ko akusado Mongen di ta esnan ku a baha pone arma na kabes di e komersiante kita  e montante di sèn ariba menshoná  for di dje.

Nan a menas’é pa keda ketu sino nan lo tir’é mata.

Despues nan a agredié ku e arma den su kabes i lag’é tur na sanger. Despues nan a drenta vehíkulo ku tabatin dos dama aden i kore bai. Un di e damanan a resultá di tabata prima di Oleana.

Oleana semper a para riba su inosensia i a bisa ku e no sa nada di atrako.

Segun Oleana e ta será kompletamente pòrnada.

Abogado general a bisa ku tin tur indikashon i asta deklarashonnan den su kontra ku e ta un di esnan ku a kometé e atrako riba e komersiante. Abogado general a  splika e dañonan ku a keda hasí na e víktimanan ku te awe a keda ku trouma.

Abogado general a haña Oleana kulpabel i a hasi  demanda di 8 aña.