WILLEMSTAD.- Djaweps 2 di febrüari 2017 Korte a deklará e kompania Curaçaosche Dok Maatschappij (CDM) bankarota.

Seguidamente wes komisario a duna e curator di e bankarota pèrmit pa bende e aktivo di CDM ku e kompanianan Damen Schipyard Curaçao N.V. i CDM Holding N.V.

Manera e desishon di Korte ta indiká, e benta aki a wòrdu prepará i a wòrdu evaluá den kuadro di un asina yamá 'pre-pack' dor di e curator promé ku a deklará CDM bankarota.

Den e desishon ta sali for di e punto di bista ku e daño kousá dor di un prosedura di bankarota pa en partikular e trahadónan i e akreedornan ta wòrdu limitá supstansialmente danki na e transakshon aki na Damen. E 378 trahadónan di Dòk lo mantené nan trabou, i e curator lo risibí sèn ku kual lo por paga debe na e akreedornan parsialmente.

Ademas e wes komisario ta remarká ku e asina yamá 'pre-pack' por ta un instrumento útil pa limitá e efektonan negativo pa entre otro e akreedornan, e trahadónan i terser partidonan, di un prosedura di bankarota i asina “skapa” un kompania.

E desishon di wes komisario ta mustra ku e realidat di e proseduranan di bankarota ku a wòrdu finalisá den e último 20 añanan na Kòrsou (alrededor di 400) ta mustra ku pago nan akreedor, kon chikitu ku e ta, ta algu hopi eksepshonal. Mayoria di e bankarotanan ta kaba den likidashon di e kompania, despues di kual no ta sobra sufisiente pa paga ni e gastunan di e prosedura di bankarota.

E asina yamá 'doorstart', kompra, di Dòk guiá dor di e curator tin e meta di limitá daño na balor di e Dòk mas tantu posibel.