Kontraloria General ku konklushonnan fuerte riba e proseso

WILLEMSTAD.-Den un rapòrt bastante ekstenso Kontraloria General di Kòrsou a analisá tur detaye rondó di kompra i benta di edifisionan di Kas di Kòrsou i ta yega na konklushon fuerte ku e desishon di e tempu ayabou di e anterior minister plenipotensiario (red. Marvelyne Wiels) i gobièrnu no a bai bon. Asta ta mustra ku por papia di desperdisio di hopi mion florin.

Kontrolaria ta yega na e konklushon ku gabinete di Minister Plenipotensiario di Kòrsou no a supstansiá ku e edifisionan no por a keda drechá mas i ku pa e motibu akí lo mester a kumpra un edifisio nobo. Al final a usa e edifisio nobo komo motibu pa bende e edifisionan anterior pasobra esakinan a bira opsoleto debí na kompra di e edifisio nobo;

Mas aleu ta resultá ku  e desishon pa kumpra un edifisio nobo no a wòrdu prepará debidamente ku un análisis di e gastunan di mantenshon i renobashon di e edifisionan na Badhuisweg kompará ku e gastunan di kompra di un edifisio nobo. Ademas e kompra di e edifisio nobo a kosta Gabinete di Minister Plenipotensiario di Kòrsou € 312.357 (ekivalente na NAf 700.305) mas ku loke a spera.

E gastunan total kalkulá pa hasi e mantenshon atrasá na e edifisionan anterior ta ménos ku e gastunan hasí pa kompra di e edifisio nobo inkluso e gastunan pa hasi e edifisio nobo funshonal. Segun e rapòrtnan di tasashon, e gastunan di mantenshon a ser kalkulá na € 845.340 (ekivalente na NAf 1.888.489), miéntras a gasta un total di € 2.340.885, kual ta NAf 5.245.052, na kompra di e edifisio nobo.

Pues, e desishon pa kumpra un edifisio nobo a kosta Pais € 1.495.545, Curaçaohuis - 16 - kual ta NAf 3.356.563, mas ku e gastunan ku lo a hasi pa renobá e edifisio di kantor eksistente.