WILLEMSTAD.- Ayera djadumingu tabata e dia ku for di den siman outoridatnan a pidi pa tur hende keda kas.

Lógikamente pa esaki tuma lugá, mayoria establesimentu na Kòrsou tabata sera ku eksepshon di establesimentunan vital p.e botika. Riba kaya tambe tabata hopi ketu. Aki aya algun vehíkulo moviendo di personanan ku eksonerashon òf personanan ku tin un trabou vital.

Bosero di Kuerpo Polisial di Kòrsou Imro Zwerwer a konfirmá pa EXTRA ku generalmente komunidat a sa di duna oido na e petishon di outoridatnan. No tabatin ningun kaso di partikularidat ku outoridatnan mester a atendé kuné.

Polisnan tabata riba kaya i a kontrolá na vários sitio pa asina wak si e outomobilistanan tabata riba kaya ku un motibu válido. Aki aya tabatin algun persona riba kaya sin motibu válido pero generalmente e dia a kana trankil.

Ta spera tambe ku pa e próksimo dianan komunidat sigui komportá i keda kas mas tantu posibel i tambe sigui kuida pa asina e sifranan di Covid-19 por baha bek.