WILLEMSTAD.- Por bisa ku komunidat di Kòrsou a komportá su mes relativamente bon den e periodo aki di COVID-19 i esaki a yuda tene e sifranan abou i e malesa bou di kontròl. Despues di a hasi un evaluashon e dianan ku a pasa, ta parse ku gobièrnu ta bai suavisá e medidanan. Sigur teniendo na kuenta ku a kuminsá ku e trayekto di bakunashon. Esei ta loke EXTRA por a konkluí for di intervenshon di nos Promé Minister, sr. Eugene Rhuggenaath, ayera na okashon di inisio dje proseso aki na e sentro di bakunashon na SEHOS (Poliklínika).

T’asina si ku mester bisa ku den kurso di awe mèrdia gobièrnu lo tene un konferensia di prensa durante kual e lo bai anunsiá kiko lo bira e siguiente pasonan. Promé Minister Rhuggenaath a duna kontesta ayera tardi ku un kara harí, loke por ta un indikashon ku komunidat por bai tende bon notisia awe! Manera ta konosí, pa algun tempu kaba nos komunidat tin di biba bou di medidanan di ‘toke de keda’, kual ta kousando sufrimentu prinsipalmente bou di negoshinan i tambe e sektor farandulero.

E mandatario den su diskurso a trese dilanti ku ta kasi un aña ku nos a ser konfrontá ku e vírus COVID-19. E pandemia a bati na porta di Kòrsou dia 13 di mart 2020, pero mesora a tuma pasonan pa mas tantu posibel mitigá efektonan di e pandemia aki. Awor nos por skohe di sigui di hiba un lucha kaminda nos ta restringí nos mes di biba liber, òf nos por skohe pa poulatinamente i kolektivamente nos bakuná nos mes pa asina ei un biaha mas por “Krea, Reinventá i Biba” atrobe, manera e slogan di gobièrnu ta bisa.

Riba e promé dia di bakunashon i den e promé periodo a skohe pa e grupo di personanan riba 60 aña, ku ta un dje gruponan vulnerabel i tambe a skohe konsientemente pa esnan ku ta traha den kuido pasobra ta nan tin di traha ku hende malu i komo tal ta eksponé nan mes na riesgo. E mandatario a hasi un apelashon riba komunidat pa sigui registrá pa bakuná. Den e mesun rosea el a rekonosé ku na momentu di registrashon hopi hende kisas no ta haña kontakto telefóniko mesora pero esei a pa motibu di avalancha di registronan ku ta drenta. Esaki a surpasá e espektativa. Gobièrnu ta spera ku lo tin komprenshon pa esaki.

Anunsio di awe:

Segun sr. Rhuggenaath, durante e enkuentro ku prensa di awe lo bai anunsiá kon ta sigui ku e medidanan a base dje resultado di e evaluashon ku nan a hasi. Tabatin evaluashonnan for di siman pasá. A evaluá e parti ekonómiko, sosial, kultural, deportivo, i tòg kier a tuma algun dia mas pa ta sigur ku e desishonnan ku lo anunsiá awe ta konkreto.

Pa loke ta e bakuna, esaki ta algu ku lo yuda pa komunidat a lo largu bai bèk tiki tiki na e bida normal. Mirando kon e sifranan a desaroyá, e ta kere ku tin base pa poulatinamente bai na suavisá!