WILLEMSTAD.-  Relashoná ku e partisipashon di Mgr Luis Secco na e manifestashon  kontra di matrimonio di mesun sekso ku a tuma lugá djabièrnè último na parke Alameda,  grupo Foko,( Fundashon Orguyo Kòrsou ) igualdat ku ta representá  e komunidat di LGBT (Lesbian, Gay, Bisexual, & Transgender) aki na Kòrsou, a manda un karta habri pa obispu Secco, ekspresando nan duele i doló di su ekspreshon durante e manifestashon den e multitut.

Segun miembronan di Foko, Mrg Secco a  bisa  ku e tabata 'felis' di tabata entre e otro gruponan di iglesia, sugeriendo, di por tabatin intenshon, di ta di akuerdo ku nan homofobia i rechaso pa ku nan  miembronan, ku ta mira e obispu komo nan mensahero di un Spiritu Universal di Amor i no un spiritu di odio. Mas aleu e karta ta bisa ku hopi di e miembronan di e komunidat di LGBT  aki na Kòrsou a sinti nan kruelmente

heridá pa e falta di empatia den obispu su palabranan, i e odio ku aparentemente den e palabranan di esnan ku a invitá Mrg Secco , a parse di ta apoyá nan ku su presensia, segun miembronan di FOKO.

“Monseñor, loke nos a sinti falta di dje ta e empatia pastoral di un Papa Fransisko, ku na mas ku un okashon a duna nos e sintimentu ku nos ta parti di Kreashon, i ku iglesia Katóliko no ta husga nos pa ken i loke nos ta”, segun palabranan di e miembronan di FOKO ku ta representá e komunidat di LGBT den e karta dirigí na Mrg Secco.

Segun FOKO mas aleu, esta no mas, despues di siglonan di persekushonnan,brongosamentu, tortura i asesinato pa motibunan religioso di hende LGBT.

Nan a sigui splika den e karta, ku su posishon di kompashon Papa Fransisko a duna nan e

sintimentu ku e era ei ta kabando.

Sinembargo, awe na Kòrsou nan a bisa di ta sinti nan mes pursiguí di nobo pa iglesianan fundamentalista, ku ta bisa abiertamente ku ta diabel ta obra den  komunidat LGBT.