Loke a sali na kla for di Foro Global di Nikotina na Polonia

WILLEMSTAD. - Manera publiká na komienso di e siman aki, EXTRA tabata na e Foro Global di Nikotina ku a tuma lugá na Warsaw Polonia resientemente, kaminda ku a diskutí e futuro di tabako i uso di nikotina. Punto di salida di e foronan aki no ta pa promové uso di tabako o nikotina, pero mas bien kon ta yega na un forma di ménos riesgo di uso di e produktonan ariba menshoná. E pronóstiko ta ku na aña 2025 lo tin 1000 mion hende ku lo ta huma sigaria o sea hasi uso di nikotina mundialmente. Un di e retonan ta, kon lihé por konvensé e humadónan aki pa kambia e forma di uso di tabako o nikotina.

Na e foronan aki tin e espasio kaminda ku siensia i e industria di tabako ta topa pa diskutí e futuro di sigaria ku defakto tin antisipashon ku sigaria komun su futuro lo ta opsoleto. Sigaria lo keda remplasá pa sigaria elektróniko o produkto di tabako kalentá (‘heat’).

E panelistanan durante e foro a debatí riba un perspektiva nobo i kon ta atendé ku nikotina, lagando atras e stigmatisashon di e rason dikon un hende ta huma.

Konforme e investigashonnan sientífiko, ta indiká ku e produktonan nobo tin e posibilidat pa baha e daño kousá pa sigaria di kombustion (sigaria komun)  konsiderablemente si e humadó tuma e desishon pa hasi uso di produktonan di ménos riesgo.

Ora ku un sigaria komun ta kima, hopi kímiko tóksiko ta bai liber i esaki ta dañino pa e ser humano. E produktonan di ménos riesgo ta redusí esaki ku 95%.

Aktualmente un di e retonan prinsipal ta pa outoridatnan stòp di nenga e informashonnan aki, pa motibu ku sigaria elektróniko, o sea produkto di vapor, tur ta kai bou di produktonan di ménos riesgo ya no ta un novedat mas.

Mester stòp di pensa ku e produktonan aki lo promové humamentu. E loke ku a sali for di e foro ta simpel, e produktonan aki no ta atraktivo pa un hende ku nunka a huma

P’esei e foronan aki ta pa e informashon por yega mas tantu posibel den publisidat, pa di tal forma e siudadano humadó por skohe, si e ta usa e produktonan òf no. E desaroyo aki ta un un kambio global.

Algun ekspreshon di médikonan, sientífikonan i tambe legisladornan, ta ku e desaroyo aki ta riba un bon kaminda. A sali na kla ku nikotina no ta e problema mayó, pero kiko ta bai hasi ku e uso di nikotina i kon ta kontinuá ku e diskushon, pa motibu ku ta konosí ku uso di e sigaria komun ta malu pa salú.

Mester yega na un konsenso i mester stòp di difamá e desaroyo aki i huntu buska un solushon.

Ketu bai tin retonan i ketu bai tin hopi pa hasi. Finalmente mayoria di e panelistanan a duna di konosé ku e foro aki tabata hopi informativo i nan a keda asombrá pa e desaroyonan ku tin.