Hues no a haña ku por papia di intento di asesinato

WILLEMSTAD.- Korte di promé instansia ayera a trata kaso di e hòmber Sedwin  Reigina (24) akusá pa intento di asesinato. Segun e akusashon el a manda outo intenshonalmente riba dos agente polisial di fam F. i D.  dia 20 di sèptèmber aña pasá.

E agente polisial di fam F. a bisa ku e i su kolega mester a bula un banda sino e velosidat ku e akusado tabata bin kuné, nan lo a muri òf  keda gravemente heridá.

Reigina ku ta será a presentá  ayera den sala di korte pa responsabilisá su mes pa su akto.

El a konta ku e dia ei su ruman hòmber a puntr’é pa bai  buska su frei kuné na trabou. Su ruman tabata  esun ku a stür e outo miéntras e tabata sintá den banda. Nan a bai kumpra ko’i kome i bayendo kas, telefòn a bèl bisa ku nan a tira un bon amigu di nan mata na na Rooseveltweg.

Nan a bira bèk pa bai na  sitio. Ora nan a yega tabatin polis para mei mei  kaminda i kaya tabata será. Segun Reigina, el a baha bai pa puntra e  polis si e  por pasa, pero polis a bis’é ku no. Ora el a  bai bèk den outo, el a bisa su ruman ku nan no por pasa. Su ruman a kuminsá kore e outo i a pasa tòg na banda riba un kaminda di tera debí ku e outo polis tabata pará skùin di kaminda. E polisnan a grita “hey kiko bosnan ta hasiendo" i nan a tende zonido di un bala. Mes ora nan a para e outo i e polisnan a kore bin bisa nan pa baha abou.

Hues Verbeek a bisa Reigina ku polis a skirbi otro kos.

Segun e agente, di fam F., despues di e tiroteo ku konsekuensia fatal riba e dia ei, nan a sera kaya pa hasi investigashon. Dado momento un Kia Ceratto a kore para i 3 hòmber a baha kana bin serka dje. Nan a puntra si nan por pasa, pero e agente a bisa nan ku esei no ta posibel.

Segun e agente e hòmbernan a kana bai outo i e a keda para na e outo di polis. Direpente e akusado riba velosidat haltu a kore bin riba e ku su kolega, kual nan mester a bula un banda pa skapa nan bida. Agente F. a bisa ku e mester a tira den laira ku su arma reglamentario pa para e outo. Segun e  agente Sedwin tabata e shofùr di e outo. Den e vehíkulo tabatin 5 persona entre nan un dama. El a sigui bisa ku un di e hòmbernan a kore bai, miéntras e otronan a keda detené. E polis a bisa  ku e no por deskribí e velosidat ku e outo a ranka bin riba nan, pero  sufisiente pa okashoná un desgrasia i asta morto.

Reigina  na su turno a bisa ayera ku el a bisa na polis fo’i e promé dia ku e no tabata stür sino su ruman. Segun Reigina el a bisa nan pa wak e kámara  di kaya pero no tabatin kámara.

El a sigui bisa ku kada bes nan ta keda bin ku kos riba dje i keda bisa ku ta e, kaminda e tabata sintá inosentemente den banda. Segun Reigina el a kaba di sinta un kondena i no ta kèns pa bolbe hinka su kurpa mas den problema.

Hues a bis’é ku su ruman a deklará, ku e tabata esun ku tabata stür. El a disidí di pasa den banda i no a skucha ku polis a dun’é órden pa para. Ora el a tende e tiru di polis el a para e outo mes ora.

Hues a bisa Sedwin, na polis frei di su ruman a deklará  ku e  tabata esun ku tabata stür. Despues di 3 dia dama a bolbe wòrdu skuchá na polis i a  bolbe bisa ku ta Sedwin tabata stür.

Durante investigashon a resultá ku e akusado no tabatin reibeweis i tabata den su periodo di prueba.

Na 2019 el a haña 30 luna di kual 6 kondishonal. Na yüni aña pasá  el a sali liber. Segun rapòrt di Reclassering e akusado tin problema ku alkohòl.

Fiskal a bisa ku Ministerio Públiko no ta konsiderá e echo aki komo intento di asesinato, paso no tin sufisiente indikashon ku esei tabata e kaso. Pero si ku por a dal e agente ku e outo si e no a bula un banda.

Segun fiskal, e agente nan no tin motibu pa gaña riba e akusado. E polisnan tabata hasiendo nan trabou i e hòmber mester a respetá ku e no por a pasa, apesar ku ta un bon amigu di nan a keda asesiná.

Mirando tur esakinan fiskal a hasi demanda di 24 luna kual 6 kondishonal ku guia di Reclassering i e outo por bai bèk pa e doño original ku ta un miembro di famia.

Hues despues di a bai deliberá a bisa ku e ta kere ku ta Sedwin tabata e shofùr di e vehíkulo. Apesar ku su ruman hòmber ta insistí ku ta e tabata kore. Segun Sedwin e agentenan a konfundié ku su ruman, pero e frei di su ruman si no por brua.

Hues a bisa e motibu ku Sedwin  lo ta keda ninga ku ta e tabata e shofùr, kisas ta paso e no tabatin reibeweis i tabata den su periodo di prueba.

Banda di esaki hues a bisa ku e prosèsverbal  ku e agentenan a traha, e no ta haña ku tabata muchu kla.

E agente F. ta bisa  e ku su kolega D. mester a bula un banda, pero e kolega no ta deklará nada di esei.

Agente F. ta bisa ku ta tabatin 5 hende den e outo, pero D. no ta bisa esei.

Hues ta kere ku Sedwin a purba pasa banda di e agentenan, pero dor ku no ta skibi presis kon duru e tabata bin, ta difísil pa bisa kiko e konsekuensia lo tabata. Segun hues ni e ni fiskal no no ta pensa ku e agente por a muri a base di loke nan a deklará i p’esei ta difísil tambe pa bisa ku e lo por a wòrdu heridá gravemente. Riba esaki hues ta duna e agente benefisio di duda.

Hues a bisa e ta tene kuenta ku su karchi kastigu i tabata den su periodo di prueba. E ta desviá for di  demanda di fiskal i ta kondená Sedwin na  12 luna kastigu kual 6 kondishonal 3 aña di prueba guia di Reclassering i sikólogo.