W’STAD./Amsterdam.- Korte na Rotterdam a kondená e akusado Aldjir Marlin (23) na un kastigu di 13 aña pa asesinato di e yu’i Kòrsou Gino Olveira (25) ku a tuma lugá dia 3 yüli 2019 na Rotterdam.
Ministerio Públiko a hasi demanda di 16 aña durante tratamentu di e kaso. Korte ta haña ku den e kaso aki por papia di asesinato, pero no asesinato premeditá.
Na sèptèmber aña pasá polis a detené Aldijr Marlin na Italia pa e likidashon di Gino Oliveira.
Segun e trabou di reshèrshinan ku a keda hasí internashonalmente, Marlin despues di su akto a hui bai Fransia i sigui pa Italia.
Durante e investigashon di polis, por a mira riba imágennan di kámara kon Marlin ta bira bèk ku su vehíkulo riba Schiedamseweg bai tras di e outo di Oliveira dal su tras.
Na e sitio a surgi un konfrontashon, di kual Marlin a saka un arma di kandela i lòs balanan dirigí den kabes di e víktima ku e konsekuensia fatal. Despues di su akto el a kore bai.
Segun fiskal, Oliveira tabata involukrá den un “ripdeal’ ku a kosta su bida.
Fiskal a bisa ku Marlin a likidá e víktima sanger friu den oranan kla di dia, pero mester atendé violensia ku arma den Rotterdam di un manera mas severo.
Segun fiskal, Marlin huntu ku hopi otro sospechoso mas a sòru pa mas di 75 kaso di tiramentu aña pasá den Rotterdam.
Segun polis den un kaso anterior, Marlin tabata e víktima den un otro kaso di tiramentu den Rotterdam.
Dia 1e yüli, dos dia promé ku Oliveira a keda likidá, Marlin mes a keda tirá na Henegouwerplein den Rotterdam.
Pa e kaso aki polisnan a detené un sospechoso di 21 aña.
Durante entrada hudisial na kas di e sospechoso, a haña e arma yená ku bala den su bibienda.
Korte a kondená Marlin pa asesinato.
E mester paga e famianan di Oliveira un total di 73 mil euro na daño perhuisio.