Miéntras wes a apsolvé ko akusado di tabata shofùr

WILLEMSTAD.- Ayera korte di promé instansia a apsolvé Quincy C. for di tur kulpa den e kaso di intento di asesinato riba e víktima L. Rofina di 38 aña, na un ‘Tire service’ na altura di Gosieweg, dia 5 di aprel 2025. Esaki despues ku  Ministerio Públiko a hasi demanda di 14 aña pa e akusado.

Pa loke ta trata e otro akusado Daniel N. (40) nasé na República Dominicana, korte a haña ku por proba ku e akusado ta esun ku a tira e víktima, ku e konsekuensia ku el a keda kompletamente paralítiko i awor ta den Mgr. Verriet Instituut.

Wes a bisa ku e víktima a bisa den tur interogashon ku el a rekonosé Daniel komo esun ku a tir’é apesar ku e tabatin máskara bistí. Segun e víktima, el a rekonosé Daniel na su postura delegá, koló i tambe na su manera di kana.

Banda di esaki tabatin vários punto ku Ministerio Públiko a trese dilanti ku a kuadra ku e investigashon. Mirando tur esakinan wes a bisa ku por proba ku e akusado ta esun ku a tira e víktima den e kaso akí i p’esei ta bai di akuerdo ku e demanda di 14 aña ku pa korte ta na su lugá.

Pa loke ta trata Quincy, wes a bisa ku apesar ku e ta esun ku a hür e vehíkulo ku a keda usá pa bai na e sitio pa kometé e akto, no por prueba ku Quincy tabata e shofùr di fuga e dia ei. Segun e veredikto, Quincy a bisa di a fia e outo na un tal Rafi i no sa kiko el a hasi despues ku e outo. Nunka polis por a lokalisá Rafi. Banda di esaki Quincy a bisa di no konosé Daniel i polis nunka a haña kòmbersashon entre nan dos den telefòn.

Tantu mama di Quincy komo e pareha a bisa ku e tabata na kas e momento ei. Pues, no tabatin niun prueba kontra di Quincy den e kaso akí i p’esei korte a apsolv’é di kulpa. Pero korte ta konden’é sí na 9 luna di prizòn, pa e arma di kandela ku polis a hañ’é kuné durante su detenshon. Pero komo ku el a sinta esaki kaba e por a bai kas for di ayera tardi.

E kaso

Dia 5 di aprel e víktima Rofina a keda tirá na altura di su garganta, pechu, skouder i vários otro parti di su kurpa. Afortunadamente Rofina a sobrebibí e tiroteo, pero a sufri heridanan grave i mester a keda transportá pa CMC i awor a keda kompletamente paralítiko.

Daniel ta keda akusá di ta esun ku a lòs balanan dirigí riba Rofina intenshonalmente i tambe e ta keda akusá pa poseshon di arma kandela. Segun testigunan e tiroteo tin di aber ku un muhé ku yama Rosa ku ta un prostituta den Skalo, ya pa 10 aña kaba. Daniel su ruman hòmber di inisialnan F. tabatin relashon ku e muhé pero tabata enkarselá. E víktima tambe tabatin relashon ku Rosa i tabata praktikamente 4 bia pa siman serka dje durante 6 luna largu. Esaki aparentemente a yega na oido di e ruman hòmber di F. ku lo a ordená su ruman hòmber Daniel pa likidá e víktima Rofina.

Despues ku e víktima a keda tirá, polis a wak riba imágennan di kámara i a mira kon e vehíkulo ku Quincy a hür, for di den oranan di trempan tabata kore bai bini den e área kaminda e víktima tabata. Despues e vehíkulo ta para, e porta di pasahero ta habri i ta mira kon un hende ta kore drenta bèk den e vehíkulo pa despues e outo kore bai. Polis a bai skucha e víktima na hospital i esaki no por a papia nada na promé instante debí na e gravedat di su salú. Úniko kos ku e por a hasi tabata sakudí kabes bisa sea si òf nò. Despues di por a kuminsá papia, e víktima  a bisa mesora di a rekonosé e akusado Daniel komo esun ku a tir’é na su postura i kaná debí ku e tabatin un maskarada di payaso bistí.

Tambe e víktima a atmití ku e tabatin relashon amoroso ku e muhé den Skalo. El a splika ku e dia ei e tabata pará ora ku direpente el a mira un hòmber ku maskarada bistí a kore bini riba dje i lòs vários tiru riba dje.