WILLEMSTAD .-Hof a kondená Jonathan Rosa na e mesun kastigu di 16 aña ku korte di promé instansia a sentensi’é pa e kaso di asesinato di un propietario chines. Durante investigashon polisnan a haña un ‘muts’ ku a keda atras durante fuga despues di e asesinato, ku a resultá di tabatin e DNA di Rosa.

Rosa a keda akusá di a tira komersiante chines Huang Wang Sheng  mata  dia  5 di òktober 2017 na  toko Chichi minimarket na  Rooi Santu. Tantu den korte di  promé instansia komo den Hof, Rosa a bolbe bisa ku e ta inosente.

Den e veredikto di korte di promé instansia hues a splika ku e pruebanan ku Ministerio Públiko tabatin kontra Rosa na promé instansia, tabata hopi suak.

Durante investigashon a drenta algun tep anónimo ku ta Rosa ta esun  ku a kometé e asesinato. Segun e informante anónimo B57, el a bisa ku el a rekonosé Rosa riba e imágennan di kámara na su postura, sistema di kana i tambe su pianan “O”.

Polisnan ku a hasi e investigashon tambe a bisa ku esun ku a tira tin mes un forma di pia “O” ku Rosa, segun e imágennan di kámara.

Durante investigashon polisnan a haña ‘muts’ riba e kaminda di fuga ku a resultá di tabatin e DNA  ku ta kuadra ku esun di akusado.

Rosa fo’i komienso a para riba su inosensia i a keda konsistente riba esaki durante vários interogashon.

Durante di e di 6 interogashon e akusado a atmití ku e ta esun ku a kometé e akto.

Durante e kaso anterior el a splika ku e plan a bin di dje i el a bai buska  su amigu Omar Brown  ku tambe a  pèrdè su bida durante e atrako, despues ku e víktima chines a lòs un tiru fatal riba dje.

Despues el a kambia e deklarashon i a bisa ku un reshèrshi a priminti’é ku si e aseptá, su kastigu lo bira ménos i e lo por bai kas mas lihé serka su famia.

Den Hof Rosa a keda insistí ku e no sa nada di e atrako. E ta kompletamente inosente. El a splika ku no ta su so tin e forma di pianan o.

Abogado general a bisa ku tabatin  un yamada telefóniko entre Rosa i un otro testigu di fam Nivillac ku ta den un otro kaso,  ku a keda di tap, kaminda Nivillac a bisa Rosa ku el a hink’e den un kos, pero e tin sigur ku nan lo lag’é bai kas. Segun e abogado general esaki por ta un afsprak ku nan a traha pa deklará.

Mirando tur esakinan abogado general a haña ku tabatin sufisiente prueba kontra di e akusado i a hasi demanda di 16 aña di kastigu.

Hof ayera den su veredikto tambe a haña ku OM tin rason i a honra e demanda di 16 aña di prizòn.