Kondena imponé den su ousensia

WILLEMSTAD. - Durante tratamentu di droga, korte di promé instansia a trata kaso di e akusado R.A. (44) bibá na Hulanda den su ousensia.

R.A. ta keda akusá di a trata na eksportá un kantidat di droga pa tera friu.

E akusado no a presentá den sala, ni tampoko tabatin un abogado pa represent’é.

Apesar di esaki, korte a  disidí di trata su kaso tòg, mirando ku e tabata na altura di su kaso.

Fiskal ku tabatin e akusashonnan na su enkargo a trese dilanti ku na polis e akusado a deklará di no tabata sa nada di e droga ku a hañ’é kuné.

Despues di esaki e akusado a disidí di no respondé niun pregunta mas i a hasi uso di su derechi keda ketu.

Segun fiskal esaki ta di 2 bia ku R.A. ta kai den man di hustisia pa mesun trafikashon di droga den tiki tempu.

Fiskal a bisa ku mester atendé fuerte ku e residivistanan ku kada bes ta keda kai pa droga, mirando ku esaki ta e problema prinsipal ku ta keda kompañá ku violensia, arma i likidashonnan.

Mirando esaki fiskal ta yega na un demanda di 18 luna inkondishonal kitando aresto preventivo.

Hues ku mester a tuma un desishon, a bisa ku e ta lamentá ku e akusado no a presentá den sala pa respondé algun pregunta ku korte tabatin pe, mirando ku na polis tampoko el a papia.

Esaki tin komo konsekuensia ku hues no sa nada di e akusado i no tin nada pa tene kuenta kuné. Mirando tur esaki nan hues a bisa di ta bai kompletamente di akuerdo ku e demanda di fiskal.