WILLEMSTAD.- Korte di promé instansia a kondená J.A. Cuevas Samboy (54) nasé na Santo Domingo na un kastigu di 3 aña pa intento di asesinato, despues ku fiskal a pidi 6 aña pe.
Cuevas Samboy ta keda akusá di a trata na kita bida di su víktima di fam Bermudez dor di kap e vários bia ku machete den su kabes dia 11 di òktober 2020.
Tambe e ta keda akusá di a maltratá e kasá di Bermudez ku e machete na su man, brasa i tambe vários parti di su kurpa.
E akusado a insistí ku e no tin nada di aber ku loke e ta keda akusá di dje.
El a bisa ku e no a hasi nada i ta inosente.
Segun deklarashon di e víktima, nan ta biba den kompleho di apartamentu i tabata bai muda pa otro kaminda.
Dado momento ora ku nan tabatin nan kahanan kla poné, e akusado a presentá i a kuminsá wak den e kaha i saka vários kos tira afó sin nan pèrmit.
A surgi un diskushon entre e víktima i e akusado.
Dado momento nan a kuminsá bringa.
E señora a purba intervení pero e akusado a saka un machete i a dal e señora kuné riba su atras, su brasa i algun parti di su kurpa.
Esei a pone ku e víktima a bira furioso i a bringa ku e akusado.
Segun e víktima, e momento ei e akusado a dal e ku e machete den su kabes i kap e profundamente.
Segun rapòrt médiko, kasi e machete a yega na e selebre di e víktima.
Fiskal a haña e akusashon kompletamente probá i a konsiderá e kaso komo intento di asesinato.
Mirando esakinan fiskal a yega na un demanda di 6 aña pa e akusado.
Hues Snitker ayera den su desishon a kondená e akusado na 3 aña di kastigu pa solamente maltrato severo ku arma. Den e veredikto e hues a splika ku no por proba intento di asesinato ni tampoko kon duru e akusado a dal e víktima.
Miéntras tantu e víktima a rekuperá.
Mirando tur esakinan hues a haña e akusashon di maltrato probá i a kondená e akusado na 3 aña di kastigu.