WILLEMSTAD.- E shofùr femenino N.C.C. (41) nase na Repúblika Dominikana, ayera tabata awa na wowo durante un kaso di aksidente ku e ta keda akusá di dje.

N.C.C. ta keda akusá ku dia 10 di mart 2019, el a dal den vehíkulo di e víktima di fam Ospina pone ku el a bira siegu na un wowo.

Ta trata di un aksidente ku a sosodé na Wiri wèg. Segun deklarashon di e víktima, e tabata koriendo su outo e dia ei riba Wiri wèg, lus sende i bentana habri.

Banda di dje i patras den su vehíkulo tabatin pasahero sinta. El a bisa di tabata kore 50 km pa ora. Dado momento el a mira un outo tabata biniendo riba dje. El a purba hala na banda pa evitá un choke, pero e no por a evit’é.

Segun e víktima, e vehíkulo a dal den dje, dal den su spil , pone ku e spil a kibra i bula bin dal den su wowo. Esei a pone ku el a pèrdè su wowo mes ora. Despues di e suseso e persona a sigui kore bai.

E akusado ayera a bisa awa na wowo ku e ta lamentá e loke a pasa e víktima. E ta traha den kuido i p’esei e manera ku e víktima a keda ta molesti’é inmensamente. Segun e akusado, e tabata koriendo e dia ei i dado momento el a sinti un sla duru den su outo.

El a spanta i sigui kore pa motibu ku e dia ei el a kaba di rekohé sèn di sam i a kere ku tabata trata di un atrako. El a bisa ku na su pareser ta e outo tabata bin riba dje. P’esei el a spanta i sigui kore. Ta siguiente dia su yunan a mustr’e kon kara di e víktima a keda den korant, ku el a spanta i konta su supervisor kiko a pasa.

Nan a rekomend’é pa bai polis mirando e situashon di e víktima. Segun e akusadó e di 3 dia di e suseso el a disidí di bai polis. El a splika ku hopi hende sa ku e sa kana ku hopi sèn i konos’é su outo, p’esei el a pensa ku nan tabata biniendo riba dje .

Hues a bisa e akusado ku polis si no a pensa esei, paso nan a hasi investigashon i a saka afó ku ta e akusado ta esun ku a bai riba e víktima i kousa e desgrasia. E víktima a keda siegu te awe na un banda di wowo pone ku su bida a kambia kompletamente. Fiskal a haña e akusashon kompletamente probá.

Fiskal a bisa entre otro ku e ta tuma e akusado hopi na malu dor ku el a sigui kore bai sin buska drechi kiko pasa. Fiskal a yega na un demanda di 30 ora di trabou pa komunidat, mas 500 florin di but  kual 100 kondishonal. Hues den su desishon a bai di akuerdo ku e demanda di fiskal.