WILLEMSTAD.- Ayera e duo venezolano Ricardo Reyes Velasquez (26) i Luis Alvarado Galindo (27), akusá di ta responsabel pa robo i asesinato di e hòmber libanes Hussein Asaad al-Najjar (49), a keda kondená na 17 aña di prizòn.
Hues Paulides den su veredikto a haña ku ámbos akusado tabatin un ròl di homisidio kalifiká.
Tur dos akusado a atmití nan kulpabilidat na polis i tambe dilanti hues.
Sua di Hussein, a hasi un denunsia na polis dia 24 di mart 2017, ku e víktima a sali fo’i su kas den su vèn dia 22 di mart pa bai un afsprak di sèn na un apartamentu na Palu Blanku, pero nunka mas no a regresá.
Dia 15 di aprel ku ta 3 siman despues, polis ta bin topa e kurpa sin bida di e víktima den un roi na Klein Hofje sin man i sin pia.
Hues a haña kompletamente probá ku a maltratá e víktima severamente, pa despues plak su boka i su nanishi, ku e konsekuensia ku el a fayesé asfiksiá.
Tambe hues a haña probá ku e akusadonan a hòrta e víktima fl700,-, su telefòn i algun pertenensia mas.
Hues den su veredikto a sigui duna di konos’é ku e hòmbernan no tabatin kompashon ku e víktima i agredié te na momento ku el a pèrdè konosementu.
Segun hues mas aleu e akusadonan a wak solamente nan benefisio i no a importá e víktima su kondishon.
Algun dia despues ku e kurpa a keda deskubrí, un informashon anónimo a drenta na polis ku Reyes i Galindo tin di aber ku e morto di e libanes.
Polisnan a hasi detenshon mesora di e akusadonan, ku a atmití ku nan ta kómplise di e echo horendo aki.
Nan a bisa ku ta un tal Danny a bin ku e idea pa laga e libanes bin apartamentu i asina nan hòrt’é i e akusadonan nan mester a yuda agredié.
Segun Reyes, e ku Luis a tape e víktima su boka, miéntras Danny tabata batié te ku el a pèrdè konosementu.
Reyes a bisa ku el a mira kon e víktima tabatin problema pa hala rosea.
E kier a yud’é pero Danny a bis’é ku no. Segun Reyes durante ku nan tabata agredí e víktima, sanger a kuminsá basha fo’i su kabes te ku dado momento el a tuma nota ku e hòmber no tabata move mas. Reyes a bisa ku Danny a listra e víktima tur kaminda i a saka 700 florin mas su telefòn fo’i su saku.
El a bisa ku nan a hink’é den su propio vèn, pa despues bai su kas i asina trata na kometé ladronisia den e bibienda, pero esaki no a resultá.
Despues nan a sigui bai ku e víktima den e vèn, pa asina buska un sitio alehá pa bent’é. Segun Reyes, despues di a benta su kurpa, nan a bai pone e vèn na un kas no habitá na Bándabou i laga esaki atras.
Reyes a bisa di a haña 240 florin for di e botin i Galindo 20 florin mas e telefòn.
Segun e akusadonan, despues di dos siman Danny a bandoná Kòrsou via aeropuerto pa Venezuela, kaminda el a keda asesiná.
Ambos a bisa di ta lamentá e loke a sosodé.