WILLEMSTAD.- E akusado K. La Crus (45) despues di 22 aña a bolbe presentá dilanti hues pa poseshon di arma di kandela.
La Crus ta keda akusá pa intento di asesinato dia 5 sèptèmber 2020 riba e hòmber di fam Van Heynigen, kaminda el a lòs vários tiru riba dje.
E akusado a konta ku tin un snèk ku yama “Sito Snek” ku ta keda dilanti su kas den Welatinaweg.
E dia ei djasabra, el a yega kas i a topa un outo pará dilanti su porta.
El a splika ku tur wikènt e hendenan ta pone outo dilanti su kas, strob’é drenta su kurá òf para vehíkulo dilanti su porta.
E dia ei ora el a yega kas, el a pita, pero niun hende a sali. El a krusa kaminda bai bisa e DJ na e snèk pa pidi e hendenan bin kita nan outo.
Ora el a kita bai, el a tende un hende grita “bai hunga.., mi no ta kita nada”. El a sigui kana bai i direpente un hòmber a bin bis’é ku e no ta kita nada i ku awe si el a kue awa (na palabra malu). Dado momento a surgi un diskushon entre nan dos i e hòmber a dal e un moketa den su kara.
Ora ku el a kai abou, el a saka un arma di kandela fo’i den su saku i a tira 2 bia den laira i e hòmber a kore bai.
El a konta mas aleu, ku ora nan tabata na warda di polis Barber, e hòmber a pidié sòri.
E hòmber a bis’é ku e no tabata sa ku el tira paso el a kore bai den otro direkshon.
Hues a duna di konosé ku tres testigu a deklará ku ta despues di e bringamentu, e akusado a bai den kas kue e arma i kuminsá tira.
Segun La Crus, e no sa ken e hendenan ei ta, un kos e sa ku e hendenan no ke mir’é ei banda, i ke pe bai.
El a sigui splika ku un bia nan a tira un “moletov” riba dje. Despues nan a bati su outo. E ta pensa ku nan a papia ku otro pa deklará kontra dje.
Un di e testigunan ku yama Wimpiri, a bisa ku e hòmber ku ta kore e “Mitsubishi”, (esta La Crus) ta esun ku a tira riba e víktima.
Wimpiri a sigui konta ku La Crus a pidi e hòmber pa kita su vehíkulo fo’i dilanti su kurá di kas pa e para, pero e hòmber a ninga i esei a pone ku nan a kuminsá diskutí.
La Crus e ora ei a kibra su tayer patras i esaki a pone ku e hòmber a dal e un moketa. Despues di e akto aki La Crus a bai den kas, kue su arma di kandela i tira riba dje.
E víktima a bisa ku e ta dispuesto pa lubidá loke a pasa, pasó tur dos tin yu i no tabata nesesario pa e kos yega asina leu.
Wimpiri a bisa ku e konosé tur dos hòmber i La Crus ta un hende masha trankil. El a mira kon e víktima tabata agredié malamente, pasó el a bisa ku el a kibra su tayer di outo patras.
Despues el a bai bèk den e snèk i direpente a skucha 5 pa 6 zonido di bala, pero no a mira ta ken a tira.
Na aña 1999 La Crus a keda kondená pa arma di kandela.
Fiskal a bisa ku e por komprondé henter e situashon, pero esei no ta hustifiká ku e akusado ta bai paden ku e arma i tira dirigí riba hende.
Mirando tur esakinan fiskal ta haña e akusashon probá i ta demandá e akusado na 5 aña pa intento di asesinato.
Abogado Alejandra a splika den su defensa entre otro, ku su kliente a atmití ku el a tira, pero no dirigí riba e víktima. Tampoko tabatin intenshon di mat’é. E abogado a pidi hues pa tene kuenta ku su kliente a wòrdu agredí pa e víktima i e úniko motibu ku e tabatin e arma, ta pa defendé su integridat i tambe su yu muhé. E abogado a pidi hues pa apsolvé La Crus di intento di asesinato.
Hues den su desishon a bisa ku e ta haña straño ku un hende ta kore i ta bira wak un otro i ta tira dirigí riba dje, pero no ta haña bala. Segun hues niun testigu a deklará esei.
P’esei e ta duda den e akusashon ei i ta apsolvé La Crus pa intento di asesinato. Pero pa loke ta poseshon di arma si hues a bisa di ta haña e akusashon probá. Segun hues apesar ku e ta apsolvé La Crus pa intento di asesinato, e ta haña e loke el a hasi tabata hopi grave. Mirando esaki hues ta yega na un kondena di 4 aña di kual 1 kondishonal, mas guia di Reclassering.