WILLEMSTAD. -Ayera korte a dikta sentensia den kaso asesinato Solar mihó konosí komo “De Zon”.
Fiskal Hato-Willems a hasi demanda di 20 aña pa Sherwin( Pumpi) Pieters(19) i Druwently (Droopi)Pieter (28),komo esnan ku a kometé e asesinato, miéntras pa Yu Liang Wu (22) el a pidi 12 aña pa kómplise di asesinato dor di duna e akusadonan arma. Pa Jerrel Nivillac (30) el a hasi demanda di 24 luna, akusá pa poseshon di arma. Ayera hues van Lieshout a bisa ku e ta haña e akusashon pa tur e akusadonan probá. Pa Pieter i Pieters el a bisa ku ámbos por wòrdu probá di a kometé homisidio i ta apsolvé nan di kulpa pa asesinato. Mirando esaki Pieter i Pieters a keda kondena na 15 aña kada unu.
Hues a bisa ku korte a bai di akuerdo ku deklarashon di e akusado Nivillac ku a duna deklarashon inkriminatorio tantu pa su mes komo e otro akusadonan.
Segun hues mas aleu, Nivillac a kambia di deklarashon vários bia, pero korte ta tene na kuenta ku dia 10 di yanüari último bou di huramentashon el a deklará konsistente indikando kon tur kos a bai.
Hues a bisa ku ta trata di un homisidio pero den kategoria hopi pisá, kaminda a basha bala 15 meter leu riba un persona inosente ku no tabatin nada di aber ku e morto di e hòmber alias “Sueño” ku e mesun anochi ei nan a likidá den Kura Piedra.
Pa loke ta trata e akusado Wu hues a bisa ku e por wòrdu probá, komo kómplise na e homisidio i poseshon di arma ilegal. Segun e veredikto Pieters a pidi Wu un arma i polis a mira kon Wu a duna Pieters e arma. Hues a bisa ku Pieters tabata sa ku e anochi ei un asesinato lo a bai tumá lugá i tòg a duna nan e arma di kandela ku15 bala . Segun hues Wu no a tuma niun aporte pa evitá e suseso.
Mirando esaki e ta kondená Wu na 8 aña kastigu kitando aresto preventivo.
Pa loke ta trata Nivillac el a atmití di tabatin un arma di kandela i ku el a tira den laira pero e arma no a funshoná. El a bai kas i despues a tende di e suseso. Mirando esaki hues ta apsolvé di homisidio i ta konden’é solamente na 24 luna pa poseshon di arma kandela. Hues a tene kuenta ku el a koprá ku hustisia i ta úniko ku a atmití su kulpa.
Solar ta e kaso ku a tuma lugá dia 22 di yüni aña pasá kaminda e víktima Idrick Sebastian Francisca, nasé na Kòrsou dia 20 di yanüari 1995, a wòrdu likidá ku un arma di kandela.
Ministerio Públiko ta akusá tur 4 pa asesinato i kómplise di asesinato. Nivilac den su promé deklarashon den sala di korte dia 10 di yanüari último a bisa ku a asesiná hende robes. Nan tur a kometé un fayo i ke pa e otronan tambe aseptá esaki.
Pieter a duna di konosé ku Nivillac ke traha su istoria i ta gaña tur loke el a bisa.
Segun Droopi, Nivillac ta esun mas sospechoso den nan mirando kon hanshá e tabata i asta a saka arma.
Durante e kaso, fiskal a bisa ku e víktima a ser asesiná den flor di su hubentut pa hende robes. E akusadonan e dia ei tabata den un momento di pániko, despues ku a kaba di asesiná un di nan su famia. Segun fiskal e deklarashon di Nivillac kontra e otro ko akusadonan ta kuadra presis ku e investigashon. Mirando e imágennan, prosèsverbal di polis i deklarashon di Nivillac e ta haña tur 4 kulpabel. Hues a bai di akuerdo pa tantu Wu, Pieter i Pieters paga e famia daño perhuisio di 19 mil florin.