WILLEMSTAD.- Ayera korte di apelashon a konfirmá e kondena di 7 aña pa e hòmber A. Cathalina (38).
Cathalina ta keda akusá pa atrako riba e toko chines Sing Fung minimarket dia 5 di mart 2020.
Segun e akusashon e akusado a bai ku e benta di dia,un kantidat di karchi di Tiling, UTS i Digicel.
Segun deklarashon di e víktimanan, el a kore drenta ku kara tapa i bou di menasa di arma di kandela a bula tras di e tonbank, ranka e kaha di plaka, destruyé i bai kuné.
Tambe e ta keda akusá di a kometé otro atrako riba 5 di mart 2020 tambe, na Hong Mei Minimarket, di e mesun manera ku na e toko promé.
Aki tambe el a usa arma di kandela kompañá ku violensia i a dal e komersiante chines na su man durante su akto.
Segun deklarashon di víktima riba e dia ei el a rekonosé e akusado ku e konosé bou di nòmber “ Kabubi,”, ora el a bin na e toko promé ku e atrako, pa kumpra un sigaria. E akusado a deklará ku bèrdat su apodo ta “Kabubi” i riba e dia ei ta kuadra ku el a bai kumpra sigaria na chines. Pero e ta ninga di ta esun ku a kometé e atrako na e tokonan.
Despues di e suseso polis a presentá na e toko Sing Fung i a papia ku un testigu ku a deklará di a mira e akusado na e minimarket Sing Fung djis un ratu promé ku e atrako. El a bisa ku e akusado a bai einan i a kumpra un sigaria.
Tambe el a rekonosé riba imágennan di kámara.
Tantu e chines komo e testigu a bisa di a rekonosé e akusado ku e mesun pañanan bisti, tambe e mesun t shirt kolo blanku mará na su kara.
Polis a tuma nota ku durante ámbos atrako el a usa e mesun paña i tambe mesun “modus operandi”.
E tribunal di korte di apelashon a bisa ayera den su veredikto ku nan ta konvensí ku e akusado ta esun ku a kometé e atrakonan, riba e mesun dia i kasi tras di otro na e tokonan. Esaki a base di e deklarashonnan di e testigu i e víktima ku a rekonosé riba imágennan di kámara i tambe a base di e pañanan i su aktuashon.
E tribunal a tene na kuenta ku el a uza arma di kandela ku violensia na ámbos toko i hinka e víktimanan den trouma. Segun e tribunal e akusado a wak solamente su interes finansiero sin importá e daño inmenso ku el a laga tras na e víktimanan.
Tambe e tribunal di korte di apelashon a tene kuenta ku e akusado a kaba di rekobrá su libertat djis un par di dia promé ku el a bolbe kometé un otro echo kastigabel.
Mirando tur esakinan e tribuna di korte di apelashon no a mira motibu pa redusí e demanda i a konfirmá e kastigu di korte di promé instansia ku ta 7 aña.