WILLEMSTAD.- Duna nòmber òf fecha di nasementu falsu na polis durante kontròl di tráfiko, òf den kualke otro momento, por tin konsekuensia di prizòn pa e persona.

Esaki tabata e kaso, ora ku durante kasonan di infrakshon tráfiko,un outomobilista a hasi su mes kulpabel  dor di bisa polis un nòmber, fecha di nasementu i adrès ku no ta kuadra ku esun di dje.

Durante tratamentu di su kaso, el a bisa ku e no a duna nòmber falsu, pero su nòmber di kariño.

Fiskal na su turno a splika e akusado, ku nan komo Ministerio Públiko semper ta hasi nan investigashon. Segun fiskal, nan a deskubrí ku e nòmber ku el a duna no ta eksistí mes. Tampoko e otro informashonnan.

Pues p’esei  a yam’e pa e bin dilanti hues pa duna kuenta i rason.

Fiskal a bisa ku normalmente pa tipo di echonan asin’aki, e kastigu lo ta 1 siman den prizòn, pero pa e bia aki ta dun’e un chèns.

Mirando esaki fiskal ta tene kuenta ku e ta un “first offender”  i ta hasi demanda di 20 ora di trabou pa komunidat kondishonal.

Hues den su desishon no a mira motibu pa desviá for di e demanda i a konden’é na e loke fiskal a pidi.