WILLEMSTAD. - Djamars tras di lomba Korte Penal di Promé Instansia na Lelystad a kondená un hòmber di 21 aña di edat ku a violá un hobensita di famia kurasoleño di apénas 13 aña di edat. E loke ku e damsita a konta ku a pasa kuné, ta un eksperensia ku semper lo persiguié. Di e forma aki tambe e abusador a kibra e hobensita su virginidat. Esaki no tabata su úniko víktima, el a abusá di un otro damsita tambe.

Konforme veredikto t’asina ku e abusador lo a topa ku e damsita i a konvensé pa e tapa su wowo ku un duki i lo gui’é pa un sitio. E hobensita no tabatin mag di kita e duki i asina e abusador a guia e hobensita den kamber di un kas.

Akinan el a kuminsá mishi ku e hobensita ku a kita e duki pa e wak unda e ta i kiko ta pasando i mesora el a komprondé ku e hòmber di 21 aña di edat tabata ke a hasi sèks kuné.

Akinan e hobensita a kuminsá forsegeá pa  por libra di e hòmber aki, pero e no ta logra. E hòmber tabata un persona basta pisá i a push’é riba kama, ranka su paña for di su kurpa i despues drumi riba su lomba i penetr’é vaginalmente.

Un otro mucha muhé ku tabata tende gritamentu a subi bai ariba i el a topa ku e hobensita sunú abou den baño i e ta bisa ku e tin hopi doló i e tabata arohá. Por a tuma nota tambe ku e tabata sangra for di su vagina.

Un otro damsita tambe a bira víktima di chantahe ora ku e mesun hòmber aki a chantagi’é ku lo “post’ un video kaminda ku e damsita aki ku tabata hasi sèks oral kuné. E tabata menasa di pone e video riba wèpsait si no pag’é. Esaki a pone ku e hobensita na vários okashon a paga e hòmber aki p’asina evitá e video subi wèpsait.

Pa damsita su sorpresa e hòmber a pone e video tòg riba retnan, hinkando e damsita den hopi bèrgwensa.

Segun rapòrtnan di e kondishon mental di e akusado, ta sali afó ku ta trata di un persona asosial, trèknan paranoya i narsista. E ta adikto pisá na mariwana i tin un problema serio ku personalidat, e no por definí kiko ta realidat o no.

Esaki ta pone ku e konseho ta pa imponé TBS, ku defakto ta un desishon pisá ku por dura basta aña.

Fiskal a pidi 3 aña kastigu di prizòn, pero hues a konkluí un kastigu di 18 luna, pero ta imponé TBS, esta na disposishon di Gobièrnu.

E lo keda interná den klínika pa tratamentu sikiátriko ku por dura entre di 4 pa 9 aña, esta te ora ku e sikiátriko nan ripara ku e por drenta den komunidat bèk sin hinka komunidat den peliger.

A imponé tambe ku ora e sali liber e no mag di drenta den kontakto ku e famia kurasoleño di ningun forma.

E tribuna a tuma 5 dia separá pa e proseso hudisial aki i a usa 22 paginá pa motivá nan desishon.