WILLEMSTAD.- Ayera korte di promé instansia a trata un kaso ku tin di aber ku “stalking”, despues ku e víktima a hasi denunsia na polis.
Ministerio Públiko ta akusá e hòmber J.G.(41) di tabata “stalk” un dama presentadó di programa na un televishon lokal den e periodo di 14 di desèmber 2017 pa 19 di novèmber 2019.
E akusado ayera no a presentá den sala pa responsabilisá su mes pa su akto.
Segun e akusashon di Ministerio Públiko, e akusado un dia a invitá e dama pa bai kome pa asina drenta den kontakto kuné. Despues e tabata persiguí e dama tur kaminda. E tabata bai para banda di su trabou riba Rooseveltweg, na su skol i tambe tabata yam’é mas ku 15 bia riba un dia, na telefòn.
E tabata buska kontakto di tur manera ku e dama via “fake account” riba tantu Instagram komo Facebook. Tambe e tabata tira sèn den e dama su vehíkulo, dun’é regalo i asta a satisfasé su mes durante un “video call” pa e víktima wak.
Vários okashon polisnan a purba intermediá pero e akusado a sigui ku su akto.
Dia 25 di novèmber aña pasá e hòmber a keda detené pa polis despues ku e dama a hasi denunsia. E hòmber a bisa ku e tabata hopi “verliefd” i tabata formando un relashon ku e dama ku a lag’é na liña. Segun deklarashon di e hòmber, e tabata duna e dama sèn i regalo i a bai kome vários bia kuné. E hòmber a bisa mas aleu ku riba petishon di e dama e tabata satisfasé su mes pe via “video call”. E akusado a bisa ku el a duna e dama sèn na vários okashon. Despues ku e víktima a hasi denunsia, e akusado a kai será pa dos luna largu.
Fiskal na su turno a haña e akusashon kompletamente probá i demandá e akusado na 197 dia di kual 120 kondishonal.
Abogado mr Le Fleur ku a representá abogado van Gils, a bisa entre otro den su rekisitorio ku e dama tabata aseptá sèn i regalo di e akusado. Tambe nan a bai kome na vários okashon. E dama mes a pidié pa satisfasé su mes pe via “video call”. Segun e abogado e akusado a yega di kai será pa lei di opio hopi aña pasá, pero nunka pa “stalking”.
E dama ku si tabata den sala di korte ayera huntu ku un miembro di “slachtofferhulp” tambe a haña chèns pa bisa algu relashoná ku e kaso.
E dama a bisa ku e ta atmití ku el a bai kome ku e akusado un bia pero despues a rechas’é. Segun e dama tambe ta kuadra ku el a tuma sèn serka e akusado, pa asina e por a keda un par di ora trankil, debí ku e akusado tabata bèl e mas ku 15 bia pa dia, riba tur sorto di number.
El a sigui konta ku bèrdat e akusado a satisfasé su mes via “video call” p’e, pero el a lag’é hasié pa e saka un “screenshot” pa mustra su mama kiko su yu ta bezig kuné, mirando ku e akusado a bèl e riba telefòn di e mama. Pa loke ta trata e sènnan ku e akusado tabata tira den outo pa e dama, el splika ku e no sa sera su outo i e hòmber tabata habrié i pone sèn aden. El a sigui bisa ku un kolega di dje ku tabata bon ku e akusado a yega bisa e hòmber ku e muchanan ei ta fásil pa haña ku plaka, debí ku nan salario ta un ko’i loko. Segun e dama vários bia el a bai polis i tur bia e tabata haña e mesun polis ku tabata hasi chèrchi di dje. Den un di e bia nan ei, el a tende e polis ta papia ku e akusado i a bis’é pa deklará ku e dama a estafé.
Hues den su desishon a bisa ku segun e rapòrt sikiátriko i sikológiko, e akusado ta responsabel pa su akto. Hues a haña e akusashon proba i a kondena e akusado na 197 dia di kual 120 kondishonal mas un periodo di prueba di 3 aña.