Despues ku víktima a saka video íntimo di e i akusado femenino
WILLEMSTAD.- Korte di promé instansia ayera a kondená 2 akusado femenino i un maskulino na kastigu di prizòn pa un kaso di atrako armá planiá pa e trio.
Ta trata di e akusadonan femenino T. i A. Martis ku ta prima i e akusado maskulino Q. Lourens ku ta pareha di A. Martis.
i A. Martis su detenshon a keda suspendé pendiente tratamentu di e kaso.
Nan tur tres ta akusá di tabata involukrá den e atrako riba e hòmber di fam Soliana dia 21 di ougùstùs 2020.
Segun e akusashon, T. Martis ku ta pareha di e víktima Soliana a plania huntu ku su prima A. Martis, pa laga Q. Lourens tira un atrako riba Soliana i bai ku su tas ku tabatin 15 mil florin den dje, mas su 2 telefònnan.
Martis a atmití ku el a pidi su prima A. Martis pa buska un hende pa atraká su propio frei.
Martis a splika ku e tabata hopi rabiá ku Soliana despues ku el a saka un video íntimo di nan dos riba kaya. Soliana lo a manda e video pa dos hende muhé i un hende hòmber.
Mirando esaki T. Martis tabata ke tuma vengansa riba Soliana.
E tabata sa ku Soliana tabatin mas ku 15 mil florin den su tas i e tabata ke e sèn pa e ku su yunan por kome, debí ku su mama a saka nan fo’i kas i e tabata biba den outo di Soliana, ku su yunan.
Segun T. Martis despues di e atrako e no a haña e sèn. Lourens durante tratamentu di e kaso a bisa ku e ta aseptá ku e tabata involukrá den e kaso, pero no ta e a kometé e echo.
El a deklará ku el a laga otro hende kometé e atrako.
Martis durante e kaso a insistí bou di huramentashon ku ta Lourens ta esun ku a atraká nan, pone arma na kabes di Soliana ora ku nan a yega kas i eksigí e tas ku plaka mas e dos telefònnan.
Na polis e víktima Soliana a deklará ku e hòmber ku a tira atrako riba dje yama Deli (Lourens), pasó e konosé fo’i chikí.
Dia 11 di sèptèmber 2020 tabatin un konfrontashon di foto i Soliana a rekonosé Lourens komo e hòmber ku atrak’é.
El a bisa ku nan tur a lanta huntu i a rekonosé mes ora.
Lourens na su turno a bisa ku e konosé e famia di Soliana i e no ta kèns pa e kometé atrako riba dje kara habrí.
Segun T. Martis ora el a yama su prima A. Martis despues di e atrako, el a tende Lourens ta bisa su prima pa bis’é si polis mester puntr’é algu di e atrakadó su kara, e mester bisa ku e atrakador no tin lágrima di prek den kara, pero krus.
Lourens a ninga redondamente i a puntra T. ta ken tin preshon riba dje pa e deklará kontra dje.
Pa loke ta trata e akusado A. Martis, el a aseptá ku el a traha plan ku su prima T. Martis pa kometé e atrako riba Soliana, pero bou di su mes petishon.
Martis a bisa ku e no a haña sèn di e atrako.
Pa loke a trata e arma di kandela ku a haña na Lourens su kas, el a aseptá ku ta di dje.
Fiskal den su rekistorio ta haña e akusashon probá a base di e akusadonan su propio deklarashonnan i tambe deklarashon di e víktima.
Mirando tur esakinan fiskal a demandá Q. Lourens na 7 aña di prizòn, A. Martis na 36 luna di kual 18 kondishonal i T. Martis na 3 aña di kual 1 kondishonal, tur ku guia di Reclassering.
Hues ayera den su desishon a kondená A. Martis i T. Martis konforme e demanda di fiskal pero a redusí e demanda di 7 na 5 aña pa Q. Lourens mas daño perhuisio di 17 mil florin.
Laga un komentario