Konfia bo instinto; bo no sa kon fuerte bo ta te ora bo pasa aden

Ya ta un aña pasá ku e chikitin Melayne Newton, e dia ei ku ni sikiera 2 aña ainda a keda detektá ku leukemia. Un chikitin ku hopi spit, ku a bisa ku e ta bas den hospital CMC a keda kore rònt, papia, sa e kaminda presis unda e ta kana, sa kon habri porta i dirigí nos te na e departamento di mucha kaminda nos di Djasabra a sinta papia ku su mama Lianne Newton.

Leukemia ku kasi 2 aña….

Lianne ta konta nos ku un aña pasá Melayne a kai i ora el a lanta i a sigui diferente tèst. Despues di 2 siman di a dun’é diferente remedi pa doló i nada a sosodé, nan a bai dòkter di mucha pa einan hasi un tèst di sanger urgente. Den un ora a haña sa ku e “bloedplaatjes” di Melayne ta abou. Mester a bai hospital ku urgensia i di einan a tende e tin un forma di leukemia. Denter di 48 ora nan mester a bula pa Ulanda pa tratamentu di Melayne.

 

Di Kòrsou pa Ulanda den 48 ora….

Tantu na Kòrsou komo na Ulanda nan a keda masha bon atendé. Pa kasualidat tabatin un delegashon di dòkter di mucha di Groningen na Kòrsou i riba e dia ei nan a bula pareu ku famia Newton.  Esaki tabata un alivio pasobra nan por a konta ku e atenshon médiko i spesialisá riba buelo. Na Ulanda nan a keda buská i a keda hiba pa PMC (Prinses Maxima Centrum). Nan ta spesialisá den kanser di mucha, kaminda tin henter un tim di spesialista pero tambe e organisashon di mayornan ku yu ku kanser.  A bai hasi tèst mesora ku Melayne pasobra ainda nan no a haña e diagnóstiko ofisial. Ta ku e tèst di ‘beenmerg’ por a stipulá e diagnóstiko. Asina Melayne a kuminsá for di e promé dia ku kimoterapia. Tabata manera un “rollercoaster” segun Lianne. Di un dia pa otro, asta ainda ora e topa hende ku e djadumingu promé ku nan a bai hospital na Kòrsou, sinta ku nan, nan por a mira ku Melayne tin doló i ni por a kana i ni sikiera por a imaginá ku den kuater dia nan a hala kita. Piki tur nan kosnan, na kas tur kos reglá, sera kranchi awa pasobra bo no sa ki dia bo ta bèk. Ta e kosnan ei nan mester a pensa den un bia promé di a yega Ulanda. Tantu Lianne su trabou komo di su kasá a kooperá masha bon i nan por a traha for di Ulanda.

‘Bo no sa kon fuerte bo ta te ora bo sa ku esei ta e úniko opshon ku bo tin”, Lianne a bisa nos den e entrevista.


No a sospechá….

Na momentu ku Melayne a bira malu, su mama  Lianne no a sospechá ku tabata kanser, sigur no den kuminsamentu. Melayne tabata un mucha di un aña i e kentura ku e tabatin, su mayornan a pensa kisas un djente tabata bai sali. E echo ku e no por a kana ta pasobra el a kai. Tabatin yen kos individual ku a pasa, ku no a lenk na otro. Síntomanan ta e kentura, soda anochi, doló pasobra e kanser ta den e ‘beenmerg’ i ta preshoná einan. Melayne tabatin tur eseinan pero kada un Lianne tabata wak individual i no a lenk nan na otro. Meskos ku nan dòkter di kas di e tempu ei no a ripará esei i nan ta komprondé i no ta tum’é na malu pasobra no ta algu ku ta sosodé tur dia. Finalmente via di e tèst di sanger nan a haña sa ku algu no ta bon. Despues di e tèst di sanger ei, a mustra ku algu ta robes, nan a hink’é mesora den isolashon. For di e djaluna ei te dia Lianne a bai airopuerto e no a sali mas for di hospital ku Melayne.

 

Melayne tabata spesífiko unda e tin doló….

E tempu ei Melayne tabatin 1 aña i 11 luna i 2 siman. Un yu asina chikí no ta fásil pa bisa kiko bo ta sinti pero tòg den kaso di Melayne e tabata masha spesífiko. Serka e dòkter di mucha e tabata bisa spesífikamente ku e tabatin doló den pia robes i despues di algun ratu e ta bolbe mustra e doló na e mesun lugá. Tabata difísil pa un mucha chikí asina bisa kiko e tin pero e por a mustra i e tabata konsistente. Ta hopi doló e tabatin pa e por a keda mustra e mesun kaminda.

Ya un aña di tratamentu….

Melayne a pasa un aña di tratamentu te ainda. Segun su mama Lianne esaki tabata otro rollercoaster pero miéntras tabata bai bon ku Melayne, tabata bon pa nan komo mayor tambe. Nan tabata sali for di e punto ku miéntras awe tabata mihó ku ayera, ta oké. I esei tabata nan punto di salida i e tim na Ulanda tambe spesialisá i ta wak hopi mucha nobo pa aña. Ta hopi mucha ta resultá ku kanser pa aña, na Kòrsou sigur 3 aña. E ta algu ku no ta bin dilanti hopi pero mas i mas e ta sali dilanti si i no sa kiko ta kous’é.

 

No sa e kousa…..

No ta asina ku ora resultá ku un mucha tin kanser/leukemia den e kaso aki no sa ta kiko ta kous’é. Tin bia ta bisa ku e mihó alimentashon ta rekomendabel. Den kaso di Melayne e tabata kome basta e kuminda ta fresku. No tin un prueba sientífiko ku ta bisa ta esaki òf esaya ta okashon’é. Te ainda e ta keda investigá pero no tin resultado di dje.

 

Rápido den rísiko standart…

Den kaso di Melayne su grado di Leukemia segun Liane ta lo siguiente; tin tres grupo  ku ta stándar, mediano i rísiko haltu. Tin e rísiko haltu ku ta hopi bia muchanan ku Down Syndrome ku ta den e grupo ei komo nan DNA tin sierto mutuashon ta tuma lugá i nan ta den e grado haltu di rísiko. Tin e rísikonan stándar i mediano i Melayne ta den e rísiko mediano. Nan ta sa esei riba e di 33 dia di e tratamentu, ta hasi un ‘beenmerg punctie’ i ta wak e aktividatnan i asina ta wak ei den kuantu e konsentrashon di e sèlnan malisioso tin ainda. Si tin kanser sèl ainda e ta kai outomátikamente den e rísiko mediano. Si e ta MRD negativo ta bai den rísiko standart. Pa loke ta e pronóstiko no ta importá, pero ta bai mas ki trayekto di tratamentu e ta haña. Ku rísiko mediano mester di mas tratamentu intensivo.

 

Situashon aktual….

Melayne su situashon aktual segun Lianne ta ku e ta kore hunga, manera nos a mira tambe. E ta bayendo hopi bon. For di aprel e ta den remishon. El a hal e MRD negativo for di aprel aña pasá. Serka Melayne e no a kai den e standar risk nèt nèt ora el a yega Ulanda. Despues di 2 luna ya e tabata den e MRD negativo. E tratamentu ta dura 2 aña i ainda no ta kla. Te ainda e ta haña kimo. Melayne a kustumbrá kuné i e sa ku ta un rutina. E ta haña masha leuk pa bai hospital. E tratamentu ta te yanüari otro aña 2021 manera Lianne a splika nos. Aki ta purba hasi mas tantu posibel ku Melayne meskos ku na Ulanda pa e sinti ku tin un uniformidat.

 

Ser fuerte….

Komo mama di un yu di kasi 2 aña Lianne por bisa lo siguiente na otro mayornan den e situashon aki. E ta bisa skucha bo instinto, konfia bo instinto i si bo haña ku bo mester di hasi otro kos ku no ta e forma stándar i si bo sinti ku bo tin di lucha pa hañ’é, hasié. Niun hende lo hasié pa bo yu pero ta abo mes tin di hasié. I banda di dje bo no sa kon fuerte bo ta te ora bo pasa den algu asina i bo no tin otro opshon. Ser fuerte, Lianne a bisa.

 

No tin miedu…

Melayne ta su promé i úniko yu i e echo ku e yu a haña Leukemia no ta dun’é miedu pa haña un otro yu i ku por haña leukemia. Nan a hasi tèst i no ta dor di Lianne i su kasá a pone ku Melayne a hañ’é den e situashon. No ta supose ta e kaso ku otro yu lo haña leukemia tambe.

 

 

SHARE

LEAVE A REPLY