WILLEMSTAD.-Un ratu pasá a surgi un situashon di malkontentu na momentu ku a skucha bosero polisial deklará durante di e briefing na WTC ku `toque de queda’ ta keda na vigor i esei ta nifiká ku tur hende mester ta na kas pa 11’or di anochi. Sentral di polis tambe a manda un anunsio pa tur polis pa tene kuenta ku `toque de queda’ ta keda na vigor normal.

EXTRA a tuma nota ku na algun urna e representantenan di e partidonan polítiko a rabia i kuminsá ekspresá esaki na polisnan. E representante di e partidonan ta haña ku mester a regla pa nan por keda na urna te ora kaba di konta e votonan. Nan ta di opinion ku nan mester por keda pa vigilá ku no tin froude. Sinembargo polisnan a haña enkargo di sentral di polis ku `toque de queda’ ta sigui normal.

Despues di e malkontentu serka e partidonan polítiko EXTRA a tuma nota ku lo a bini un otro òrdu den sentido ku lo a bisa polisnan pa kuminsá tuma nòmber di tur hende na urnanan. Esaki mester sirbi pa ora polis topa hende riba kaya mas lat pa nan por verifiká si ta trata di hende ku tabata na urna. Si ta un hende ku tabata na un urna e lo no tin problema, pero otro hende si ta haña but.

E situashon a bòltu pasobra awor miembronan di Kuerpo Polisial ta mustra ku e kambio di mando polisial ta hasi kosnan konfuso. Si tin `toque de queda’ anto mester mantené esei i no traha regla den regla. EXTRA ta keda pendiente pa tende mas di mando polisial riba esaki.