WILLEMSTAD.-Minister Armin Konket na nòmber di gobièrnu di Kòrsou a duna splikashon riba e desishon ku a kai den seno di Konseho di Minister pa subi salario di ministernan. Minister Konket ta bisa ku a surgi un konsternashon den komunidat rondó di e adaptashon di salario di mandatarionan. Segun e mandatario e momentu ku a skohe pa hasi e adaptashon den e salarionan ta basa riba un obligashon pa atendé ku esaki.

Minister Konket ta splika ku na konsepto di gobièrnu, no tin nada straño ku a tuma lugá. Un kos ta sigur, no ta bèrdat ku mandatarionan a faboresé nan mes. Gobièrnu ta apoyá e desishon di ámtenarnan pa bai korte, di e forma aki korte lo por duna un opinion riba desishon di gobièrnu i asina trese klaridat pa tur partidonan. Konket a sigui bisa ku a yega tempu pa komunidat bisa si e ta haña ku e salario di un minister por ta mas abou ku esun di su supordinadonan.

E úniko alternativa ta di adaptá e salario di ministernan sino mester baha salario di tur ámtenar. Mayan ta entregá e lei ei na Raad van Advies. Tambe e mandatario a sigui bisa ku den e desishon ku a tuma a tene debido kuenta ku situashon sosio ekonómiko di pais. Mas detaye den edishon di EXTRA.