WILLEMSTAD.- Gobièrnu di Kòrsou a proklamá 17 ougùstùs (mañan), komo dia di Lucha pa Libertat i fecha kaminda ta konmemorá ku na aña 1795, a tuma lugá e gran lucha pa Libertat bou di guia di Tula i su kompañeronan.  E aña aki Gobièrnu huntu ku Asosiashon Promoshon Konsenshi Istóriko ta organisá un grandioso konmemorashon na Parke Lucha pa Libertat na Rif riba djárason 17 di ougùstùs di 18.30 or pa 21.45 or.

E konmemorashon e aña akí tin komo lema sentral: “No mas rekolonisashon, ban pa mas emansipashon!” Ku e lema akí ta pone énfasis riba e nesesidat pa nos tur komo Yu di Kòrsou tuma rienda den nos man i sigui traha duru pa logra mas emansipashon pa nos pueblo.

E aktividat ta konta ku partisipashon di Minister-Presidènt sr. Gilmar Pisas, Minister Interino di Enseñansa, Siensia, Kultura i Deporte sra. Dorothy Pieters-Janga, sra. Susanne Camelia-Römer i sr. Tyrone Brunken. Tur esaki ta keda kombiná ku músika di Grupo Rítmiko Den Dam, baile di Grupo Folklóriko Ambiente Kultural, Grupo E Pèrlanan di Kòrsou i e ganadó di e bataya di Rap 2022, Wenny Haywood. E programa ta terminá ku presentashon spesial di Doble R ku entre otro e piesa “Tula warda”.

Bini unu bini tur pa nos haña informashon i tambe gosa di un programa kultural variá i asina duna homenahe na Tula i tur e luchadónan di 1795. Inspirá pa e lucha di Tula nos ta konmemorá: “Dia di Lucha pa Libertat”, djárason awor, 17 di ougùstùs, na Parke Lucha pa Libertat na Rif.

Pa mas informashon por tuma kontakto ku sr. Gilbert Bacilo  na  +5999 9 563 03 58 òf sr. Frank Quirindongo na +599 9 522 69 82.

Presensia i partisipashon di kada siudadano ta keda altamente apresiá.