WILLEMSTAD. - Despues ku parlamentario Rennox Calmes a hasi algun pregunta pa ku un persona a haña un puesto haltu den kuerpo polisial ku lo mester a bai den un forma no transparente, Lider Polítiko Bernhard ‘Ben’ Whiteman’ djasabra tras di lomba a trese esaki dilanti ku el a tende ku ta trata di un sua di un minister ku lo a haña un puesto haltu den Kuerpo Polisial. Tur kos ta indiká ku en bèrdat sea ta un sua òf un bon konosí di un minister ku lo a haña e puesto en kuestion.

Siman pasá parlamentario Rennox Calmes a hasi pregunta den reunion públiko den Parlamento, relashoná ku un puesto ku un persona ku a bin for di Aruba lo mester haña den Kuerpo Polisial.

Calmes a pidi informashon di Minister pa sa kon e solisitut aki a bai i tambe tabata ke dokumentunan di e solisitut.

Calmes a puntra tambe ku si Minister por informá parlamento kiko e persona aki a bin yuda kuné aki na Kòrsou i ku no tabatin niun kurasoleño den kuerpo polisial kapasitá pa hasi e trabou ku e persona for di Aruba a bin hasi.

Pero na momentu ku Minister di Hustisia lo mester a duna kontesta, Calmes no tabata den sala i Minister a pidi Presidente di Parlamento si e por manda e kontestanan por eskrito, loke ku defakto a sosodé tambe.

Djasabra tras di lomba Lider Polítiko Bernhard ‘Ben’ Whiteman e hasi menshon di e loke ku a keda puntrá durante reunion públiko. Whiteman a splika ku e no tin detaye, pero segun e rumornan ku el a haña t’asina ku mester a regla puesto pa un sua di un minister pa drenta kuerpo polisial. E informashon ku Whiteman tabatin ta ku e persona aki lo ta sua di un minister prominente.

Whiteman tabata di opinion ku si esaki ta bèrdat, anto ta di lamentá, pa motibu ku na momentu ku tin stòp di personal, ta mandando hende kas ku oferta pa baha mas tempran, ta tuma hende na trabou den aparato di gobièrnu i e hende ta bin djafó.

Konforme informashon di ku EXTRA a haña ta indiká ku en bèrdat a persona ku tabata forma parti di e kadena hudisial na Aruba lo a haña e puesto di  “hoofd Recherche en Informatiedienst”, aki na Kòrsou. Pues un puesto den Tim di Maneho di Kòrsou.

E persona aki di inisial F.M. di desendiente surinameño tabata traha na Aruba su tim di RST i lo a haña un kontrato di 2 aña aki na Kòrsou.

Whiteman durante su disertashon djasabra ta splika esakinan ta  e kontroversianan di e gobièrnu aktual i p’esei ta difísil pa su persona por tin konfiansa den e bon intenshonnan ku e gobièrnu aki tin pa e pueblo aki.