Despues di a kometé perhurio i falsifikashon di dokumento

WILLEMSTAD. - Den un veredikto resien Konseho di Apelashon den kasonan di ámtenar ta ratifiká retiro di un miembro polisial (brigadir), despues ku el a apelá e desishon di korte di ámtenar den promé instansia a bai di akuerdo ku e desishon ku gobièrnu a tuma pa retirá su persona.

E ámtenar tabata miembro di Kuerpo Polisial komo Brigadir. Dia 18 di novèmber di aña 2016, e ámtenar aki a keda arestá i poné den kustodia riba sospecho di a hasi su mes kulpabel na perhurio i tambe falsifikashon di dokumento. E echo kometé tabata dia 13 di òktober 2016. Dia 20 di novèmber 2016, a pone e agente den libertat pendiente su kaso keda tratá den korte penal.

Riba dia di suspenshon di detenshon, Hefe polisial a prohibí e agente subi terenonan di Kuerpo Polisial i tambe ofisinanan. Den e mesun karta a notifiká e agente ku lo start un investigashon penal i banda di esei un investigashon pa yega na desishon disiplinario.

Esaki a kondusí na un kondena di 12 luna kondishonal den Korte Penal di Promé Instansia i dia 18 di òktober 2018 den Korte di Apelashon e kastigu a baha na 6 luna prizòn kondishonal i 2 aña di prueba. Komo kastigu adishonal, korte a stipulá ku e agente no por sigui ehersé su tarea komo ámtenar pa 3 aña.

Despues di e veredikto aki Mando Polisial a duna e agente retiro disiplinario  i riba esaki e agente a apelá.

Den Korte di Amtenar den promé instansia, e tribunal ta ratifiká e retiro manera ku Hefe di Polis a imponé.

E agente ta apelá esaki tambe i resientemente Konseho di Apelashon den kasonan di ámtenar ta konkluí  ku e desishon di Promé Instansia ta na su lugá.

Konseho di Apelashon den kasonan di Amtenar a bisa ku e desishon ta na su lugá, pa motibu ku e agente a faya den un forma grave ku su obligashon komo agente polisial  i ku e aktuashon aki e agente klaramente a mustra ku e no tin e mentalidat di ta un bon agente polisial, manera ku komunidat ta ferwagt di dje. P’esei Mando Polisial ta konsiderá e agente aki inkapasitá pa ta un agente polisial.

E Konseho ta splika e agente tambe ku e retiro no ta desproporshonal, pa motibu despues di e veredikto di Korte Penal, e lo mester a ferwagt e konsekuensia pa su trabou. Si e retiro a bin despues di mas di 1 aña, no ta for di proporshon.

Esaki ta pone ku e agente polisial ta pèrdè su kaso ku el a apelá i e retiro a keda ratifiká.