WILLEMSTAD - Mirando hopi konmoshon i klepnan ku ta bai rònt, Konseho di Iglesianan di Kòrsou ke afirmá lo siguiente: Deklarashon hasí pa pastor di un iglesia kristian kontra sierto partidonan polítiko ku aktualmente ta den kontienda elektoral ta keda responsabilidat di e organisashon ku a tene un enkuesta bou di partidonan polítiko i e pastor ku a hasi e deklarashon aki.

Direktiva ehekutivo di Konseho di Iglesianan di Kòrsou, ku ta representá mayoria denominashon i iglesia riba nos isla, ku tin nan diferente punto di bista pa ku tόpiko nan legal i di áreanan di gobernashon, lo no por duna un konseho di voto di tal índole, basá riba matrimonio di personanan di mesun sekso.

“Den nos afan di para pa union, nunka nos mester pèrdè e oportunidat si pa instruí nos pueblo rèspèt pa HENDE i rèspèt pa e instituto matrimonial.”

Dokumentunan manera “Kongregashon di FE”, di iglesia Katόliko Romano ta papia di matrimonio entre e hòmber i e muhé, ku ta duna otro palabra di fieldat ku e fin di ta Ko-kreador ku esun ku a krea hòmber i muhé sigun Su semehansa. Dos muhé òf 2 hòmber por drenta kua kombenio di kombibensia legal ku nan ke, pero nunka e kombenio aki por ser konsiderá komo ni yamá MATRIMONIO.

“Bai i multipliká “ta outoridat, duná pa naturalesa i pa Dios na un hòmber i un muhé.”

Un relashon entre personanan di mesun sekso ta keda un eskoho di 2 persona ku tin derecho pa asta drenta un kombenio legal pa regla nan kombibensia, pero no ku esaki por keda aseptá pa e Iglesia di Kristu komo un matrimonio.

Laga nos ku ta pertenesé na e Iglesia di Kristu ta kla riba esaki i no krea mas konfushon i divishon den un komunidat den desaroyo.

“Nos konseho di VOTO ta: Tur hende bai vota i tene kuenta ku tur regla pa salú i disipliná. Nos ta un pueblo sivilisá ku ta respetá HENDE.”

Meyrtha Leetz-Cijntje (presidente)

Gilberto Bakhuis (sekretario)

Ronald Kiban (vise-presidente)

Judith Menig (tesorero)