Gabinete Pisas a sorprendé Knops

DEN HAAG.-Informashon for di Den Haag ta indiká ku Konseho di Minister di Reino, den un reunion ku awe mainta na Ulanda mester a trata COHO, a skòrs e tratamentu di e punto aki. Segun informashonnan for di Den Haag, sekretario di estado Raymond Knops a keda altamente sorprendí ku deklarashon di minister di finansa Javier Silvania den un programa na radio Nieuwsbv den kua e mandatario a bisa ku Kòrsou no ta bai di akuerdo mas ku e proyekto di lei adaptá ku ta trata COHO.

E punto ta ku algun siman atras a Sali un komunikado di prensa den kua ta indiká ku Kòrsou, Aruba i Sint Maarten a bai di akuerdo ku e kambionan ku a hasi na e COHO. No ta konosí kiko lo ta e konsekuensianan una bes ku Konseho di Minister di Reino a keda sin trata e COHO. Prinsipalmente konsekuensianan pa e islanan ya ku ta serka e islanan e situashon ta primi. Keda pendiente pa mas detaye.