WILLEMSTAD.- Tin tur indikashon ku e proyekto ku ‘DEN E BEMBE’ a yama ‘Karnaval Drive Thru’ lo no tuma lugá.

Tin demasiado faktor ku ta hungando un ròl.  Instansianan di Gobièrnu, konosí komo ‘stakeholders’ di Karnaval, no a bai di akuerdo pa e evento tuma lugá i a duna un konseho negativo.

‘DEN E BEMBE’ a komprondé ku den luna di desèmber tabatin un petishon ku a keda hasí pa un ‘Fiesta di Lus’ riba Nieuwe Haven, pero esaki tambe a risibí konseho negativo.

Un dje puntonan mas prinsipal ta e echo ku ‘Nieuwe Haven’ ta un ardu mayó di tráfiko na Kòrsou. Aserka ta bin ku bo mester tin sufisiente personal pa garantisá mantenshon di órden públiko. E kantidat di públiko ku por spera ta pone tambe ku lo kousa stagnashon den tráfiko, anto esaki sin konta ku e evento lo tin un efekto riba e área di Saliña kaminda públiko sa aglomerá na kantidat.

Un proposishon ku tin riba mesa aworakí ta pa hasi e evento un virtual.

Gobièrnu, lesa sektor di Kultura lo tin ku tuma un desishon final si ta kanselá e evento òf ta sigui esaki konforme e proposishon ku tin riba mesa.