WILLEMSTAD.- ‘Mi ta hopi konsiente ku e reto nobo ku mi a aseptá dos siman pasá ta un honor grandi i difísil.  Pero mi tin fe ora mi ta traha duru ku tur ‘stakeholders’. Mi ta sigur ku nos por logra hopi kos bon pa enseñansa,’ Asina minister nobo di Enseñansa, Siensia, Kultura, Siensia, Kultura i Deporte Steven Croes a bisa ayera durante tratamentu di presupuesto di su ministerio pa aña 2021 den reunion públiko di Parlamento di Kòrsou. Segun Croes Kòrsou ta pasando den momentonan difísil. ‘Mi ke bisa nos hóbennan, nos mayornan, nos maestronan: Nos tur ta preokupá.’ Mas aleu Croes a bisa ku konsekuensianan e pandemia di COVID-19 pa sektor di enseñansa, siensia, kultura i deporte ta grandi. ‘E konsekuensianan ta mas grandi ku nos por a ferwagt. Tòg ta importante ku nos ta keda ku speransa i ku nos ta keda ku fe pa sali afó.’

Segun Croes  ‘huntu nos por krea un mihó enseñansa pa nos yunan i fortifiká kultura i siensia pa nos pais i stimulá deporte aun mas. Ta nos chèns pa tur problema nos por haña un oportunidat i huntu nos por krea enseñansa, siensia, deporte i kultura mas dirigí  riba nos futuro.’

Croes a bisa ku den e último  dianan el a hasi un apelashon fuerte pa tantu su ministerio i tur esnan ku ta enbolbí den e sektor aki pa traha huntu i pone diferensia na banda i focus riba bienestar di e muchanan.

Croes a bisa ku den e último dos siman el a bishita tur departamentonan di su ministerio. ‘Nos a papia ku kada departamento pa haña mas informashon i pone kosnan kana. Mi a bishita diferente skol i mi a papia ku diferente maestronan i direktor di skolnan. Mi a bai na tur direktiva di skol pa skucha nan preokupashonnan i haña nan input.’

Croes tambe a papia ku diferente plataformanan manera Funderend Onderwijs i Speciaal Onderwijs, VSBO, SBO i HAVO/VWO pa haña nan input tokante konsekuensianan di e pandemia di COVID-19 riba enseñansa. Croes tambe a bishita direktiva di sindikato di SITEK.

El a bisa ku e ta keda hopi impreshoná di e bon trabou den e diferente sektornan di su ministerio.